Den entrevista cu lider di RAIZ, Sr. Ursell Arends, el a splica cu for di diabierna cu a entrega e lista e reaccion tabata positivo bou di hendenan di tur edad, cu ta sostene e partido nobo cu yama RAIZ.
Partido RAIZ a haci un yamada na e pueblo di Aruba, pa nan bin e dependance di Censo, pa no solamente bin sostene RAIZ, pero bin sostene tur e 7 partidonan politico, cu ta colectando 578 firma pa asina participa na e eleccion y pa nan haya e sosten necesario.
Sr. Arends, como hoben politico, e ta disfruta di cada seconde di e experiencia aki. E ta haci’e pa Aruba, pa tin un miho futuro pa tur persona bibando ariba e pida baranca aki. RAIZ ta spera cu nan por haya e sosten pa e pueblo di Aruba.
Diabierna ultimo, segun Sr. Arends, nan a haya un recepcion hopi positivo di e pueblo di Aruba, mirando e forma con nan a bin pa entrega nan lista. E pueblo a ricibi nan na un manera positivo. Nan no ta kere den fanfaria, nan ta kere den haci politica manera mester ta. Nan no a bin pa haci politica pa e pueblo, pero ta e pueblo haciendo politica.
Faltando mas o menos 40 dia pa eleccion, Sr. Ursell Arends, den representacion di New Millenials, a bisa cu e grupo aki ta representa un total di 20.282 voto y nan ta spera cu e Millenialnan tambe por reconoce y sostene e vision nobo cu partido RAIZ tin pa Aruba.