Awe, 26 di april, ta cumpli su 99 aña, un gran ciudadano, un ciudadano ehemplar, Sr. Juan Chabaya Lampe, miho conoci como ‘Padu’.
Juan Chabaya Lampe (tambe Tata di Cultura) a nace dia 26 di april 1920 na Aruba. El a bira popular den Antia Hulandes y den Caribe como pianista, cantante, autor y pintor. E ta conoci pa su nomber aristico Padu del Caribe. Juan Chabaya Lampe a wordo yama door di su padushi y el a haya e nomber di cariño Padu. Padu a casa cu Daisy Croes na aña 1946. E tin un yiu cu yama Vivian Lampe y e tin dos nieto chikito.
Poco artista local no a bira hopi famoso manera Padu del Caribe, e tabata sumamente popular na Aruba y na Antia. Su composicion cu el a haya di su mesun estilo supremo cu ta hopi conoci na Antia Hulandes, Venezuela, Colombia, Merca y Hulanda.[2]
Biahe
Padu tabata kier semper pone e nomber di Aruba y su canticanan Arubiano bira conoci, p’esey el a toca na Curaçao, Bonaire, Caracas, Medellin, Maracaibo, San Juan, Sto. Domingo, Havana, Miami, New York, Hulanda y Seattle.
Desaroyo musical
Na e edad 9 aña Padu tabata tin hopi interes pa musica, pasobra el a lanta den un famia musical. Padu su Tata Harry Lampe tawata tocado di piano y tawata lesa nota musical. E tata di Padu a forma un grupo chikito cu su rumannan. Zep Lampe (fluit), Olivier Lampe (violin),Wim Lampe tawata toca cuarta, wiri y piano. E famia Lampe tawata biba na Nassaustraat. Ora e famia tawata hunto, nan ta traha cantica y esey tawata hopi agradabel. Semper tawata tin hende ta para pafo pa scucha y ora nan caba di toca, nan tawata bati man pa duna e tocadonan mas smak pa sigui toca.
Amistad
Ora Padu tawata chikito na un cas scuchando un bunita cantica di e paino y e ta scucha Rufo Wever toca e piano Padu cu su 8 aña y Rufo Wever cu su 11 aña hugando. Padu a bis’e: “ami tambe kier toca asina”. Esey tabata e nacimento den un amistad largo.
Otro instrumento
Despues di piano cu el a siña caba Padu a cuminsa practica cuarta, violin, mandoline y klarinet. Despues di un tempo di les di piano, Padu a cuminsa haya poco poco su mesun ritmo y estilo. For di e edad hoben di 16 aña, el a cuminsa toca pa publico. Padu a concentra riba su piano y compone musica cu e cuarta. Prome e melodia, compone musica riba e cuarta, despues practica riba e piano y pa ultimo e ta skirbi e texto. Asina e tawata hacie. El a demostra cu e por bon den otro ritmo manera Merengue, Dansa, Bolero, Mambo, Twist Rock y Swing.
Cantica special
Pa tur e mamanan riba Dia di Mama, Padu a skirbi un cantica “Pa ma”. Pa su nieto chikito ‘Erwin Anaya’. Padu a copia un cantica cu ta yama “Sonrisa di un baby” y el a skibri e texto den tres idioma. Padu a haya e composicion un di su mas bunita trabou.
Himno Nacional
Rufo Wever y Padu hunto nan a skirbi y saca e wals Aruba Dushi Tera esaki tawata na aña 1976, cu a bira oficialmente nos “Himno y Bandera” di Aruba.
Autor
E ta autor di tres buki tocante filosofia y metafisica.
– The 3rd Element .
– Harmoniology.
– Ciencia acercando e mundo spiritual?.
Pintor
Den presencia di Gobernador di Aruba y cu Biblioteca Nacional a haci acto di apertura di un exposicion exponiendo su cuadranan nobo. Tabata un apertura hopi formal, caminda drs. Mirto Lacle a elabora riba e Doctorado di Padu. Tambe sr. Stan Kuiperi a duna su comentarionan durante su discurso.
Padu a yega di pinta hopi den su bida y bo ta haya nan den hopi lugar entro otro e biblioteca di Aruba. Pa su pinturanan, el a haya varios diploma y el a plak nan na su cas como recuerdo. Esaki ta algo hopi animante p’e.
Distincion y premio
Pa contribucion cultural,e famia Real Hulandes a eleva Padu como un cabayero di Oranje Nassau.
Na e edad 75 aña el a haya e Zilveren Anjer.
Lampe a ser honra cu e titulo como Doctor Honoris Causa na Maracaibo, Venezuela.
Premio Nacional Juan Chabaya Lampe
Minister Michelle Hooyboer Winklaar a introduci un premio cu lo wordo otorga cada 2 aña. E premio ta carga e nomber di e culturista mayor di Aruba, Padu del Caribe. Como reconocimento pa e persona Padu Lampe, un premio lo wordo otorga na e persona, grupo of instancia cu a destaca riba tereno di musica, literatura y arte como un premio di estimulo. E premio lo ta den forma di un suma atractivo. E prome premio a wordo otroga na Ryan Oduber.
Busto
Julie Oduber a organisa cu 80 artista Arubiano, un homenahe na Padu na aña 2000 na Cas di Cultura. E fondonan recauda a sirbi como base pa crea e busto y a wordo amplifica cu e fondonan di Marcel Curiel cu ta omo di Raul Henriquez di Aruba Trading Company. E fondo a crea e busto y dia cu Mama di Cultura a haya su ceremonia di despedida na Cas di Cultura, Minister di Cultura, Ramon Lee a divulga e plan cu tin pa e plaza dilanti di e edificio, bira un plaza cu bustonan di e grandinan den cultura di Aruba.