E eleccion aki ta keda den man di pueblo paso e aña aki por mira menos auto cu bandera y sticker. Tin n hopi cos pa bay drecha na Aruba, segun Sr. Candelario “Booshi” Wever.
E reaccionnan ariba rednan social ta hopi bon, segun Sr. Wever. El a sigui bisa cu hopi hende ta wak e cantidad di bandera y sticker cu tin ariba auto. Pero mester concentra ariba esunnan cu no tin. E no kier bay ariba ken tin mas hende of laga. Henter atardi di diabierna y henter weekend despues di entrega di lista, e unico discusion cu tabata resalta, ta e potretnan photoshopped cu tabata viral ariba rednan social. Cual tabata esun mas grandi. Niun hende no ta puntra e pakico cual partido ta para pe. Y esey ta cosnan cu PPA/UPP ta para p’e. Nan lo kier pa pueblo mira cu nan ta e alternativa real, consistiendo di hende cu experiencia, hende cu tin seriedad den locual nan ta haci y cu nan tin innovacion tambe den dje. Esaki lo ta e ingredientenan pa cualkier coalicion. E pueblo di Aruba merece un coalicion, ya cu pa e ultimo 8 añanan Aruba tabata tin un stempelparlement, unda cu gobierno ta dirigi Parlamento.
Por mira cu tin un ex- minister na cas, e no ta aparece ariba lista, el a comete un fechoria pero e ta na cas y ta sigui cobra, mientras e ta na cas. Esaki ta algo inaceptabel. Door cu tin un stempelparlement, si esaki no tabata e caso, e cos aki lo a bay otro.
Sr. Booshi Wever a sinti cu e e ambiente durante e entregamento di lista tabata hopi bon, nan tin un lista bon balansa. PPA/UPP tin e alternativa real pa e pueblo por scoge. tin un alternativa unda cu tin seriedad, innovacion y experiencia. Esey ta loke pueblo kier. E combinacion PPA/UPP ta para pa integridad. For di e prome dia, den caso cu nan forma parti di un coalicion, nan lo exigi pa aplica e reglanan di Good Governance. Y den e prome 100 dianan, tur e reglanan aki lo wordo mara na ley. Esey ta pa niun politico hinca den nan cabes pa comete cualkier fechoria.
Por ultimo, Sr. Booshi Wever, a splica cu e siman aki nan tin e reto di logra e 578 firmanan necesario. Hopi hende no ta yegando, den e eleccion pasa e proceso di firmamento a bay hopi mas lihe. Aworaki e ta bayendo hopi mas slow, door cu tin hopi hende pafo, door di e carnaval cu tin pafo. E ta kere cu mas den siman nan lo keda cla cu nan firmanan y nan ta cla pa campaña.