Durante un conferencia di prensa, Sr. Ricardo Croes, presidente di e Partido ReD Democratico a lansa un candidato nobo cu ta Sr. Benjamin Romano.
Sr. Romano ta di e bario di Pos Chikito, Savaneta. Su trayectoria academico, ta uno basta largo. Despues cu el a caba su estudio secundario na Filomena College MAVO y despues ela sigui pa Colegio Arubano, cual el a termina cu exito. Despues di esey el a drenta e mercado laboral, den e refineria. Den e refineria el a haci su Operations training, pa ta un Operations Technician.
Sr. Romano a labora pa 6 aña den e refineria, y el a maak mee e cambionan di Coastal, pa El Paso/Valero. Despues di esey, el a dicidi di sigui su estudio nan Hulanda. Esey ta den añanan 2007/2008. Den e temporada ey tambe, cu nan tabata bezig cu introduccion di BBO. Tur hende por corda e conseho di e Institutonan Financiero local y internacional, cu a conseha e gobierno di e tempo ey, Gabinete Oduber II, pa no implementa e BBO den e forma acumulativo.
Pero gobierno no a sigui cu e conseho y a introduci esaki toch, cu tabata tin un impacto negativo ariba e economia di Aruba. Pa e motibo aki, e refineria no tabata por a competi cu otro refineria rond mundo. Esey a pone cu Sr. Romano a bay Rotterdam pa studia International Business Managament. Despues di su estudio el a traha na Hulanda y tambe na Irlanda, como Assistant Manager pa Irish Osteoporosis Society.
Despues di a biba 6 aña na Europa, Sr. Romano a regresa Aruba pa yuda Aruba su economia progresa. E tin 3 aña na Aruba y el a traha na varios empresa na Aruba.
Sr. Romano ta un persona cu no ta gusta papia hopi, y sin bisa nada, sin cumpli cu nada y e ta laga esey pa Prome Minister. Tampoco e ta gusta haci fanfaria, bochincha, sunchi baby, pone baile cultural, djis pa presenta su mes como politico.
E partido (nan) cu ta bay sinta despues di 22 di September, lo mester atende tres temanan importante, cu mester wordo atendi cun’e. Uno ta e debe astronomico cu Aruba tin, dos ta e problemanan social cu tin pa varios aña caba, bou di cual ta cay crimininalidad. E di tres ta e medio ambiente, cu ta bou di presion enorme door di cambionan climatologico, y desaroyo economico y caotico di ultimo añanan, segun Sr. Benjamin Romano, candidato ariba e lista di ReD Democratico.