Desde luna di mei a inicia e proceso di buskeda pa director nobo di Dienst Technische Inspecties (DTI)pa haya e persona di mas adecua pa maneha e retonan cu e departamento tin. Segun Minister encarga cu Desaroyo Teritorial, Infrastructura y Medio Ambiente Minister Otmar Oduber a anuncia cu despues di e proceso aki sr. Anko Koopmans a demostra di ta e persona mas adecua, pa cual ta desea e director tur clase di exito cu e reto nobo!
DTI ta un di e departamentonan cu ta traha cu mas tanto ley considerando diferente trabou di control y inspeccion cu nan tin. Ora di construi cas, inspecciona mashin y ora cu ta para responsabel pa siguridad den diferente aspecto entre otro.
Minister Oduber ta splica cu conhuntamente cu e trabou haci pa colega encarga cu labor pa e Arbowet esaki ta bira algo sumamente importante pa DTI. Lo mester hiba e departamento DTI den e era cu servicio mester ta na prome luga y caminda cu nos hendenan por haya acceso na DTI cu personal necesario y cualifica pa por atende cu e retonan cu tin nos dilanti. Tambe percura cu e den e añanan cu ta bin ta traha riba modernisacion di leynan, considerando cu basta di nan ta data di basta aña atras y cu e desaroyonan tecnologico e leynan ta obsolete. Y pues cu por comberti e leynan den uno mas actualisa, Minister Oduber a termina bisando.
Anko Koopmans:
‘Nos tin bastante reto nos dilanti cualnan lo bay traha riba nan di biaha. Como director esaki ta un reto nobo pami saliendo for di e industria di coaching cu mi tabata aden anteriormente. Sigur tin hopi positivismo pa hiba DTI dilanti.’
E introduccion tabata cu ful e grupo di empleadonan di DTI den un seno profesional. E prome paso lo ta pa conoce e departamento, continua cu e ‘lopende zaken’ y asina inculca mi mes den tur e procesonan di DTI.
Lo bay percura pa motiva empleadonan y comunidad pa conhuntamante ta mas sigur. ‘Arbeidsveiligheid’ ta un aspecto hopi importante cual mi lo traha riba dje considerando cu cifranan di accident na pia di trabou ta halto. E ta hopi trabou, pero mester cuminsa un dia. E meta ta pa tur hende bay y bin fey trabou sano y salbo, sr. Koopmans, a termina bisando.
Siguridad na pia di trabou ta un aspecto hopi importante cual lo traha riba dje desde inicio considerando cu cifranan di accident na pia di trabou ta halto na Aruba