SAN FRANCISCO, Merca- E aplicacion di manda mensahe instantaneo WhatsApp, propiedad di Facebook, a bisa dialuna di a detecta un vulnerabilidad den su sistema cu a permiti piratanan informatico di instala un spy malware den algun telefon, y a accede asina na datonan di contenido dene telefonnan.
E compania a confrima den un comunicado na prensa e informacion cu’n paar di ora mas trempan a keda publica den forma di exclusividad den Financial Times y a urgi su 1.5 biyon usuarionan na mundo pa “actualisa e aplicacion na su ultimo version” y pa mantene sus sistema operativo up to date como medida di “proteccion”.
WhatsApp, cu a wordo cumpra door di Facebook na 2014, a indica cu na e momentonan aki ainda e no por bisa precisamente cuanto persona a wordo afecta, pero el a sigura cu e victimanan a wordo eligi, “di manera specifico”, pa cual na principio e no tabata un atake na gran escala.
E “spyware” cu tabata wordo instala den e celularnan “ta hopi parecido” na e tecnologia desaroya pa empresanan di cybersecurity Israeli NSO Group, cual a pone cu WhatsApp a marca e compania aki como e sospechoso principal tras di e spyware aki.
E vulnerabilidad den e sistema, pa cual e empresa a saca un codering dialuna mes, a wordo detecta algun dia atras y actualmente no ta conoci pa cuanto tempo e actividadnan di spionahe ta tumando luga caba.
Hackernan ta haci un yamada atraves di WhatsApp na telefon na cual datonan nan tabata kier a accede y incluso den caso cu e persona na e otro banda no responde e yamada, un programa “spyware” tabata wordo instala den e dispositivonan.
Den hopi di e casonan e yamadanan tabata aparece despues den e historial di e aparato, di manera cu, si e usuario no a wak e persona drenta na su momento, e usuario afecta no lo sospecha di nada.
WhatsApp a sigura cu apenas cu nan a haya di a atakenan, el a avisa organisacionnan di derechonan humano (cu tabata entre e victimanan di spionahe) na empresanan di cybersecurity como tambe Departamento di Husticia di Merca.