Play Off HEINEKEN fast pitch di Aruba Softball Bond dedica na Minguel Tromp y Emelina “Mamai” Loopstok a inicia riba veld di Kudawecha. Spuiters MIPA kende a termina temporada solido na di tercer luga mester a warda riba un wega di deskite entre Macuarima Indians vs Balashi Premuim kendenan a empata na di 4 luga cu 10 victoria y 14 derota unda den un wega decisivo pa mira kende ta drenta play off Balashi Premuim a derota Macuarima 9-1 conectando 9 hit y Macuarima solamente 1 hit. Esaki a crea e atmosfera pa inicia cu e play off cu un serie di best out of (3) entre Spuiters como number 3 vs Balashi Premuim # 4. Diadomingo ultimo riba veld di Kudawecha e serie aki a inicia unda Balashi Premuim ta Sali brabo riba e lansador Angelo “Dang Dang” Arnold conectando e un total di 15 imparabel bon pa 11 careda pa concretisa e prome victoria. Balashi Premuim 11 careda, 15 hit, 1 eror. Spuiters 5 careda, 4 hit, 0 eror. Pitcher ganado ta resulta Gerald Werleman kende a wordo releva pa Jorge Santana den di tercer entrada. Angelo Arnold a ricibi relevo di Henk Arnold den di 4 inning pero resulta pitcher perdedo. Miho bateadornan pa Balashi Premuim ta Filbert Thiel 4-3, Djurwin Croes 3-2, Josmar Thiel y Nathan Berkel ambos di 4-2, Sando Geerman di 5-3 incuyendo un bataso di cuater skina. Pa Spuiters Gracindo Wester a bay di 2-1. Mesora manera e ritmo di henter campeonato a inicia e di dos partido di best out of 3. Spuiters ta recupera y Henk Arnold usando su experiencia a sa di domina e bateria fuerte di Balashi limitando nan na 8 hit. Spuiters su hungadonan ta duna nan pitcher e respaldo necesario pa asina gana e partido y empata e serie 1-1. Spuiters MIPA 11 careda, 15 hit, 1 eror. Balashi Premuim 5 careda, 8 hit, 2 eror. Miho bateadonan pa Spuiters ta Vincent Cham 5-4, Walfredo Wester 3-2, Deyon Peterson 4-3, Richard Krozendijk 4-2. Pa Balashi a destaca na plato Gerald Werleman 1-1, Filbert Thiel 4-2. Di manera aki e serie ta empata na 1 victoria pa banda forsando un wega decisivo diaranson awo pa 9pm na veld di Kudawecha. Desde 7:15pm lo tin wega number 2 di e final di Aklas entre Piratas vs Celebrities. Pues fanaticada Bo tin un compromiso na Kudawecha diaranson awor. Softball fast pitch cu weganan emocionante den gran forma.