E plataforma digital di música Spotify diamars a debuta riba e Bolsa di Balor di New York cu un avance di 26% di su titulonan. Esaki ta un lansamento cu caracteristicanan diferente di loke ta custumbra riba e mercado.
Na diferencia di e tradicional lansamentonan bursatil, Spotify a debuta diamars sin emiti titulonan nobo pa gana fondonan y sin e “roadshow” tradicional pa promociona e operacion. Ademas, e compania a mantene un low profile durante e lansamento.
Spotify a dicidi cu desde diamars su accionnan actual lo por wordo cotisa riba e Bolsa di Balor di New York (NYSE), sin cu e compania mester a fiha un prijs ni di balor ni di salida, manera ta normal den ofertanan inicial publico.
Asina mes, NYSE a fiha un prijs di referencia di 132 dollar dialuna, segun e acuerdo logra pa Spotify den transaccionnan priva anteriormente.
Na momento cu e operacionnan a cuminsa, pa 12 or y 44, hora local, e balor di cada titulo tabata di 165.9 dollar, cu un avance di 26% relaciona cu e prijs di referencia di NYSE.
Analistanan a bin ta insisti cu, contrario na ofertanan inicial publico (IPO) e prijs di Spotify, cu ta opera bou di e simbolo SPOT lo wordo afecta pa un votalidad grandi te ora cu e consolida su mes.