Sports Zone Aruba a haya e chens di pa un siman largo participa na e di 4 y posibel ultimo Curacao Baseball Week. Un siman yena cu informacion di e top di baseball na nivel di Major League Baseball y College Baseball mientras nos a enjoy un anochi unico di “Night at the Ballpark” cu a cera e siman cu broche de oro.
Coaches Clinic
Diasabra mainta nos a cuminsa cu e Coaches Clinic den Rennaissance Curacao su ballroom. Un total di 4 session cu a ser presenta pa Jerry Weinstein di e ekipo di grandes ligas Colorado Rockies hunto cu John Vodenlich di University di Wisconsin. Miembronan di Team Kingdom of The Netherlands afilia na KNBSB, pitching coach Steve Janssen hunto cu hitting coach Sidney de Jong a duna presentacion di e 4 aspectonan di baseball: hitting, fielding, catching y pitching. Jerry Weinstein tin un curriculo bastante largo na unda actualmente e ta funciona como Director of Development di Colorado Rockies unda e ta encarga pa tur nan atletanan firma. Mas aun Weinstein ta fungi como Manager di Team Israel cu lo ta den e World Baseball Classic unda lo e bay enfrenta Team Kingdom na Korea na Maart proximo. John Vodenlich ta actual manager di University of Wisconsin cu ta hunga Division 3 den NCAA unda den su trajectoria di 13 aña na varios ocasion a sa di bay cu e titulo maximo. John a concentra hopi ariba defensa di outfield, unda e la splica cu coachnan mester dedica mas tempo cu nan outfield, nan por yudabo gana y perde un partido. Despues a sigui un session di catching cu antes catcher di seleccion di Hulanda Sidney de Jong. Sidney tin un historia amplio cu Team Kingdom unda na 2013 el a dal e doblete contra di Republica Dominicana pa avansa Eugene Kingsale pa tercera unda eventualmente nan a laga e fuerte ekipo faborito di Republica Dominicana den tereno. Diadomingo a sigui varios session na Blue Bay Resort mes, unda cu Eugene Kingsale a demostra e tecnicanan pa e arte di toke. Weinstein y Vodenlich a keda asombra pa e manera con Kingsale a presenta e materia. Kingsale a pasa ariba un aspecto importante di baseball cu ta coremento di base. Kingsale a splica cu pa su persona, e arte di toke combina cu e bon coremento di base a pone mas oportunidad den su carera pa eventualmente hunga pa Baltimore Orioles. Despues a termina cu un session di pregunta cu Jerry Weinstein y John Vodenlich unda a splica hopi riba e aspectonan di forma un atleta y como coach tin ora nos kier pa tur nos hungador yega Grandes Ligas pero semper mester keda corda ariba e 99% cu nunca ta yega. Jerry Weinstein a splica cu pa Colorado Rockies e ta importante pa duna tur atleta firma balor. Mas balor un hungado tin hopi oportunidad ta presenta na momento cu menos nan ta spera y nan ta focus hopi ariba duna atleta un balor agrega.
Kids Clinic
Dialuna a cuminsa cu 4 dia di Kids clinic hunto cu tur e grandinan den e deporte di baseball na Curacao. Didi Gregorius actual shortstop di New York Yankees tabata presente desde inicio. Jonathan “Mamba” Schoop actual segunda base di Baltimore Orioles, Jurickson Profar di Texas Rangers, Juremy Profar firma cu Texas Rangers, Sharlon Schoop firma cu Baltimore, Ozhaino Albies prospecto grandi di Atlanta Braves tur tabata presente hunto cu e staff di Team Kingdom. Manager Hensley “Bam Bam” Meulens a guia e training hunto cu coach Ben Thijssen, Steve Janssen, Sidney de Jong cu Eugene Kingsale. Tambe presente tabata e hungadornan di Team Kingdom, outfielder Kalian Sams, Henley Statia y Richardson. Pitch, Hit and Run Major League Baseball ta un partner intergral di Curacao Baseball Week unda tur aña nan ta trece material pa asina por organisa e programa di Pitch, Hit and Run na unda na cada nivel ta duna tur mucha un chens di pitcha, bati y core. Na final tur mucha a ricibi nan certificado di Curacao Baseball Week y un total di 6 mucha a gana un pasashi pa bay mira un wega official di Grandes Ligas na Miami Marlins Ballpark danki na Blue Bay Resort y su partnernan.
Night at the Ballpark
E anochi di diabierna a cera den gran forma unda e fanaticonan di baseball di Curacao a haya e chens di haya nan articulo firma y un potret hunto cu e astronan di baseball di Curacao. Despues a sigui un wega di softball unda e celebridadnan di Curacao manera sprinter Churandy Martina, cantante Dibo D y comediante Bokswiri tur a join e anochi deportivo. Un sorpresa pa nos di Sports Zone Aruba ta di a topa cu e leyenda di San Nicolas, Aruba nada mas y nada menos cu Rafi Jozefa Sr. cu a conta nos con e tabata hunga cu Heineken na Aruba pa despues a bin establece su mes na Curacao. Rafi Jozefa a kibra record di homerun na Antias Hulandes y ta un di e grandinan den e deporte di baseball na Curacao. E anochi a finalisa cu un tremendo show di forsa y poder durante e homerun derby unda a participa e rumanan Schoop, rumanan Profar, Sams y Richardson di Team Kingdom. Kalian Sams den e prome rond a demostra pakico e ta defendiendo su titulo di Homerun Derby King di Curacao Baseball Week, Sams a deposita poco bala pafo di Tio Daou Ballpark pero den e rond final e hoben Juremi Profar a demonstra cu e ta un hoben cu mester tene cuenta cune y ta gana e titulo maximo di Homerun Derby King. Sports Zone Aruba kier a gradici e staff di Blue Bay Resort hunto cu e ekipo cu a traha duro pa organisa e Curacao Baseball Week. Un gradicimento na full e staff di coaches pa e coaches clinic unda a haya informacion valioso di e ultimo desaroyo den e mundo di baseball moderno. Na e organisacion di Curacao Baseball Week un danki grandi. Pa mira tur e potretnan di e Curacao Baseball Week por bishita nos ariba nos Facebook Sports Zone Aruba, of nos Instagram y Youtube pa tur e videonan di entrevista haci cu varios di e astronan di baseball di Curacao. Of bishita nos website www.sportszonearuba.com