E siman aki Aruba ta conoce un atraccion nobo di awa cu yama Splash Park Aruba. Randy Geerman, kende ta e propietario, ta splica mas di e plannan di e actividad aki cu awor tin nobo na Aruba.
Esaki ta un culminacion di un proceso cu ta bezig cune pa un tempo caba. Esaki ta un concepto di divercion sano pa famia henter, actividadnan corporativo y pa scolnan, caminda cu ta ofrece turistanan riba nos mesun isla y tambe pa nos turistanan cu ta bishita nos di afo. E ta algo sano, dibertido y no tin nada di motor y ta totalmente friendly pa nos beachnan, cuminsando diahuebs padilanti.
E idea ta cu esnan cu kier bishita y disfruta di e parke acuatico aki, cual ta un inflatable waterpark, ta cumpra ticket y ta bende pa ora. Hendenan ta cumpra y haya un banchi y cada ora por subi bay diberti nan mes, for di mucha 6 aña bay ariba.
Esaki ta un actividad liber, por bula, cay en awa, graba nan mes, tur loke kier haci. Loke si ta bay den futuro ta actividadnan corporativo caminda cu ta haci un style di Aruba Ninja riba lama, etc. caminda cu por haci teambuilding pa companianan cu ta interesa den haci esaki.
Esaki ta bay ta habri tur dia for di 9’or di mainta pa 5’or di atardi;
Banda di e parke acuatico aki, ta habri naturalmente. E area di parke ta priva y esnan cu kier tin acceso pa disfruta di dje, mester paga pa esaki.
E area cu a wordo scogi tabata un intercambio cu personanan encarga cu turismo, como parti di plan di ministerio di turismo cu tin pa un maneho di beachnan nobo, caminda cu e area scogi pa deportenan acuatico no di motor, ta complementa esaki y e ta algo disponibel for di e Linear Park, cual por trece mas movecion tambe den e area.
Pa mas informacion por haya nan rib Facebook, Instagram y tambe via nan webpage www.splashparkaruba.com y ta bezig ta setup. Ainda nan no ta full cla y lo cuminsa habri poco poco y lo laga pueblo sa y pa fin di September ta spera di haci e inauguracion oficial, segun Randy Geerman.