Corte awe a dicta fayo den e caso cu Ophelia Beyde a cuminsa contra e periodista Speed Andrade. E conclusion di Corte tabata cu Andrade a haci expresionnan sin por prueba esakinan (manera mal trahado) contra Beyde pa cual e mester rectifica den dos dia di tempo.
Hues a bisa cu como periodista e tin derecho di tin su propio opinion y ta critico. Sinembargo e no por haci expresionnan (acusacionnan) sin tin prueba. Den e caso di hortamento di password di computer di Leoncita, Hues a bisa cu ora el a haci e expresion den su programa Enfoke 90, e no a menciona cu ta basa riba informacion di Leoncita Arends y tampoco tin prueba cu ela bisa esey despues. Banda di esaki el a papia cu Beyde ta mal trahado. Segun el a bisa, e ta prueba esey pa e hecho cu e Gobierno a kit’e for di trabou. Pero Hues a bisa cu den e sentencia cu berdad Beyde a perde, nada di esaki ta wordo bisa. Esta cu el a wordo kita pa ta mal trahado. Ademas, despues a tum’e na trabou atrobe. Tampoco e tin prueba di loke el a bisa cu Beyde a reparti pamfletanan den eleccion di 2017 den cual e l a bisa cu Beyde a acusa Leoncita Arends di practicanan dudoso relaciona cu tereno erfpacht.
Awo Speed tin cu rectifica y e no mag haci ningun comentario extra riba e texto di rectificacion cu Corte a pone pa e papia na radio.