E di 17 edicion di Soul Beach Music Festival ta bai tuma luga un bes mas na Aruba, esaki lo ta e di 15 biaha cu Aruba ta anfitrion pa e evenemento aki. Organisadonan a revela nan repertorio amplio di artista cu ta inclui ganador di multi- platina Grammy Award, Faith Evans, e Reina di R&B, Mary J. Blige, fenómeno mundial Usher y banda icono y ganador di Grammy, The Roots. Blige a caba di lansa su senciyo nobo titula ‘Thick of It’ di su proximo album yama ‘Strength of a Woman’. E tema ta subiendo di posicion riba e listanan di popularidad di e forma mas lihe cu a yega di wak den mas di 20 aña pa loke ta trata cancionnan adulto di R&B. Additionalmente, bishitantenan lo wordo entretene pa Cedric the Entertainer, cu ta wordo categorisa como “the Original Kings of Comedy” durante e anochi di comedia. Hunto e artistanan lo duna un espectaculo di caliber halto durante e fin di siman di ‘Memorial Day’, esta di 24 pa 29 di mei 2017 proximo.
Soul Beach Music Festival ta e evento cu lectornan di USA Today a pone na posicion #4 entre e “10 Best Caribbean Celebrations” y #1 “Caribbean Summer Festival” dor di Jetsetter Magazine.
E evenemento aki a crece bira un experiencia unico pa e bishitantenan cu a conduci na un crecemento den anochinan cu e bishitante ta keda riba nos isla. Bishitantenan cu ta bin pa Soul Beach Music Festival ta conoci pa ta disfruta plenamente di Aruba su oferta culinario y admira e paisahenan tranquil. E aña aki, organisadornan lo ta introduciendo un app cu lo informa e bishitantenan di diferente oferta riba nos isla, asina motivanan pa experiencia tur loke Aruba tin pa ofrece. Esaki ta permiti negoshinan cu un budget mas chickito pa tambe por yega na e bishitantenan y asina promove nan producto of servicio. Ademas, usarionan lo por cumpra nan ticket pa e diferente anochinan via e app.
Aruba ta anfitrion pa 15 aña caba di Soul Beach. Pa e motibo aki ta importante pa midi e impacto economico di un festival manera esaki pa asina compronde si e invercion hasi ta uno cu merito. Pa cu esaki, A.T.A. a traha conhuntamente cu University of Central Florida varios aña pa asina midi e impacto economico pa nos isla di un evenemeto manera Soul Beach Music Festival y otronan. Resultado di estudia na 2015 ta indica cu e evenemento di Soul Beach tabata tin un impacto economico di 5 miyon dollar Mericano directamente pa nos isla, 13 miyon dollar mericano indirectamente. A.T.A. su inversion tabata di un total di 850 mil dollar den e evenemento durante e mesun aña. A.T.A. ta reconoce cu e lineup di un festival por tin un impacto riba con atractivo e ta pa atende, y asina tambe atrae mas bishitante pa nos isla. Pa e motibo aki “A.T.A. ta sigui traha di cerca cu e organizacion y a yega na un acuerdo aña pasa unda a mustra di ta dispuesto pa añadi mas fondo, si e organizacion por logra sigura un A-lister di mas caliber na e line-up. Den cuadro di esaki a acorda nombernan di artistanan cu lo califica pa fondo adicional. Fondo adicional lo ta mara tambe na mas cantidad di bisitante y na mas balor promocional pa Aruba. Tur e aspectonan aki ta mara pues na metanan eleva pa e organisacion,” asina Ronella Tjin Asjoe-Croes, CEO di Aruba Tourism Authority.
Carchi pa localnan ya caba ta na benta na e prijs special di $60 na varios localidad di Citco, Ponton service station, Salt & Pepper, Reflections, Moomba, Funmiles, Dragon CD Electronics y na Café the Plaza. Pa mas informacion por subi nan pagina web, http://www.soulbeach.com, of sigui nan riba Twitter y Instagram @SoulBeachMusic. Tambe por like nan pagina di Facebook, Soul Beach Music, pa keda na altura di tur informacion.