Sostenedornan ta haya cu Richi Danies su detencion ta inhusto

Reginald Danies

Conocido activista Richie Danies a presenta dilanti Hues comisario dialuna 12 di October, na unda cu su detencion a wordo prolonga segun Masnoticia por a confirma cu Ministerio Publico. Sr. Danies pues ta keda deteni na KIA te ora mester trata su caso. Su detencion ta a base di sospecho di instigacion, destruccion of pegamento di candela segun OM, cual ta delitonan cu fiscal por impone un castigo di prison.

For di su sostenedornan, esnan cu ta parando cu sr. Danies pa hopi tempo caba den protesta contra ‘abuso di mucha y tur otro tipo di abuso’ manera nan a describi, ta bao di e impresion cu Danies su detencion ta inhusto y basa riba ningun prueba. Nos a puntra un reaccion di OM riba esaki pero no a haya un contesta solamente cu Danies ta ‘wordo sospecha di menasa y instigacion.’

Richie Danies ta riba caya desde luna di Juli purbando di convence pueblo pa lanta y subi caya manifesta pa nan derecho, den cuadro cu ningun solucion pa abuso di mucha y tambe tur otro tipo di abuso. Sr. Danies a enfatisa cu Aruba tin un problema grandi den parlamento y cu Hulanda ta bisa mescos den cuadro cu corupcion y mal maneho, y pa e motibo aki tabata pidi pueblo di Aruba pa lanta para y protesta pa esaki.

Comments

comments