ANTWERPEN, Belgica- Corte di Antwerpen a condena cuater homber na castigo di prizon pa abuso di dos turista Hulandes. E incidente aki a tuma luga na maart ultimo. Tambe nan lo mester paga un daño y perhuicio di 12 mil euro.
E dos hobennan di 21 y 20 aña e anochi anterior tabata den un discoteca y na final di anochi a acepta un lift di dos hende homber cu nan a conoce den e discoteca. Den e camber di hotel nan a wordo abusa door di e dosnan aki. Den curso di anochi dos otro homber a drenta den e camber y nan tambe a abusa di e dos hobennan aki.
Pa su mañan, e victimanan tabata corda masha poco di e sucedido, door cu, segun nan testimonio, nan a wordo droga. Te despues cu e personal di hotel a bisa nan cu e cuater hombernan aki a bandona nan camber, nan a realisa kico a pasa. Nan placa y nan celular tambe a disparce.
Exigencia di shete aña
E cuater sospechosonan a haya castigo di prizon di entre cuater y cinco aña. Den tur e casonan aki tabata tin un aña di prizon condicional.
Ministerio Publico a exigi shete aña pa tur cuater, pero segun corte no ta proba cu nan a yuda otro pa comete e acto di abuso. Tampoco ta cla si enberdad e victimanan a wordo droga.
E sospechosonan a keda para ariba cu e relacion tabata a base di consenso. Despues di e sentencia un di e abogadonan defensor di e sospechosonan a bisa di lo apela.
Abogado di e victimanan tambe a bisa di lo apela e sentencia. Segun e abogado, e castigo ta mucho abao.