Boneiro: Fundashon Wega di Number Boneiru tin pèrmit di gobièrnu pa organisá wega di number. Nan ta paga impuesto riba ganashi di esaki i tambe parti di e ganashi ta bai pa organisashonnan karititativo na Boneiru. Na fin di 2018 Fundashon Wega di Number Boneiru a hasi denunsia di wega di number ilegal. Na komienso di 2019, KPCN a inisiá un investigashon. Na final di e investigashon, 11 persona a keda konsiderá komo sospechoso. Según Ministerio Públiko, e sospechoso prinsipal tabatin un ròl krusial den e lotería ilegal aki. E tabata buska bendedó, duna printer portátil na e bendedónan, tuma e ganashi i manda esaki pa personanan na Kòrsou. Pa e motibu aki e sospechoso principal S.T.V. ta den korte pa labamentu di plaka di ganashi di lotería ilegal.
OM a hasi demanda di un kastigu di prisòn kondishonal di un luna plùs un kastigu di trabou di 120 ora mas un but di $15.000,- pa e sospechoso S.T.V. Tambe a pone beslag riba algu mas ku $13.000,- di dje. Pa e otro 10 sospechosonan ku a bende number ilegal, OM a pidi un kastigu di trabou i un but ku a wòrdu kalkulá di akuerdo ku e benefisionan ku nan a haña dor di nan aktividatnan ilegal. Banda di esaki, un di nan a distanshá su mes di e plaka ku e la gana. Korte a sentensiá konforme demanda di Ministerio Públiko.