Sospechoso di contrabanda di droga deteni na aeropuerto di Boneiro

Riba diadomingo 23 di mei a detene dos persona na Aeropuerto Internashonal Flamingo pa sospecho di tin den posesion y/of pa traficacion di substancia narcotico. E detencion a tuma luga en conexion cu un control conhunto di Koninklijke Marechaussee y Duana Hulanda Caribense.

Durante di e control a controla algun persona dor di haci uzo di un test di urina, loke ta indica si posiblemente un persona tin droga den su curpa. Di e personanan controla, dos a test positivo. A base di esaki Duana a detene e personanan aki y a pasa nan pa Marechaussee.

Despues di detencion tur dos sospechoso a coopera cu e control pa medio di un ‘bodyscan’, cu cua por mira si ta transporta droga den curpa. Un persona a ser laga den libertad despues di e scan, e di dos persona a keda den detencion en espera di investigacion mas aleu.

Koninklijke Marechaussee y Duana Hulanda Caribense regularmente ta ehecuta control conhunto na aeropuerto na Boneiro, cu como meta identifica y para criminalidad cu ta crusa frontera. Koninklijke Marechaussee ta ehecuta e investigacion mas aleu riba encargo di Ministerio Publico.

Comments

comments