BARCELONA/LIMBURG- Diadomingo, un di e hombernan mas busca na Hulanda pa mas di 20 aña, Jos Brech, di 55 aña a wordo deteni. E ta wordo acusa di agresion sexual y asesinato di Nicky Verstappen, di 11 aña na 1998.
Segun polis di Limburg, Hulanda, e forsanan di siguridad Spaño tabata por a captura e sospechoso despues di a ricibi e aviso di un testigo cu a reconoce Bech danki na su potretnan cu a wordo publica den medionan di comunicación durante e ultimo dianan.
E menor a disparce for di un camping
E menor a disparce di su tent den un campamento di verano, den e provincia Hulandes di Limburg, unda cu Bech tabata traha como supervisor. Un dia despues a bin haya e cadaver di Nicky cu señalnan di a wordo abusa sexualmente.
Despues di un investigacion na gran escala realisa e aña aki, a identifica Brech, cu a disparce for di su cas na april y autoridadnan ta kere cu e lo tabata zwerf den Europa, kedando den casnan aisla a cambio di cuminda.
Autoridadnan Hulandes ta describo Bech como un persona capas di sobrevivi den solitario den teritorionan manera mondinan y incluso cuebanan. Tal parce cu Bech ta un hiker experimenta cu a biaha pa Nepal, India y Pakistan. Incluso, el a hasta subi Mount Everest.
Horror y cautivacion
Brech tabata registra como un persona cu tabata na e escena di e crimen na 1998, algun dia despues di e asesinato. El a wordo para pa polis y interoga. Pero e tempo ey a kere cu e tabata inocente.
Despues di a wordo raporta como desapareci, polis a haci un huiszoeking na su cas y a descubri su DNA cu tabata klop 100% cu esun haya ariba e curpa di Nicky.
Nicky Verstappen, e mucha cara di purunchi, a bira e simbolo di menasanan sin cara, cu ta persigui menornan.
Mama di Nicky Verstappen, Berthie, a declara a television Hulandes di cu su famia no por kere cu detencion lo a bin asina lihe, despues di e peticion di polis di dia 22 di augustus.
“Nos ta spera cu awo nos haya contestanan lihe ariba e preguntanan cu nos ta haci nos mes”, el a sigura.
Un abogado defensor conoci, a sigura di ta prepara pa hiba e caso, ya cu riba e curpa di e mucha a bin haya restonan di DNA di otro personanan tambe.