Algun siman despues di cu e sonda Paker a completa e biahe mas cerca di solo den histoira, e datonan di e vuelo aki a cuminsa yega Mundo.
E vehiculo espacial a realisa su prome sobrevuelo di e strea aki entre 31 di october y 11 di november, dianan despues di cu el a pasa e parti mas externo di su atmosfera, conoci como corona solar, na un velocidad super rapido.
Cu su dispositivo WISPR, e sonda Parker a saca potret desde e interior di e capa di gas particulanan carga di biento solar y NASA a comparti un di e imagennan aki dia 12 di december.
E potret aki, tuma dia 8 di november, ta mustra un ‘serpentino’: un structura di material cu sa cubri regionnan di mayor actividad. Su structura ta aparece di manera cla, cu al menos, dos rayo visible.
Na momento cu e documento grafico a keda capta, parker tabata situa na mas o menos 27.2 miyon km di e superficie di solo. E obheto briyante cu ta aparece den e parti central ta Jupiter, e planeta mas grandi di e sistema solar, mientras cu e puntnan scur ta resultado di un corecccion di background.
E mision di e sonda aki, cu ta realisa su di dos sobrevuelo rond di Solo na april otro aña, lo durar te 2025. E agencia espacial Mericano ta spera cu esaki yuda na resolve algun misterio tocante e atmosfera di e astro aki, manera pakico su atmosfera exterior ta bira casi 300 biaha mas cayente cu su superficie y of pakico e biento ta alcansa velocidadnan asina halto.