Hende homber heterosexual soltero mester soporta un competencia feroz pa haya un “chich” y prueba di esey ta e estadisticanan di e websitenan di cita (dating apps), segun e dokter di psicologia, Greg Matos, den un articulo pa Psychology Today.
E hende hombernan ta representa aproximadamente 62% di e usuarionan di e aplicacionnan di cita, loke ta reduci nan posibilidadnan di haya un pareha y haci cu e hende muhenan ta bira “cada biaha mas selectivo” n’e cantidad di candidatonan potencial.
E psicologo ta kere cu awendia e hombernan hoben y di edad un tiki mas grandi ta “mas nan so di loke nan tabata “ever” den varios generacion,” un situacion cu “probablemente solamente lo bira pio.”
Saliendo di su propio experiencia di contacto semanal cu un centenar di persona, e experto a conclui cu e hende muhenan di edad entre 25 y 45 aña ta prefera hende homber emocionalmente disponibel, bon comunicado y cu ta comparti balor similar.
Sinembargo, e problema pa hende homber ta cu e conexion emocional ta un elemento vital di amor a largo plaso y cu e conexion aki ta rekeri di henter un serie di habilidad “cu e famianan ainda no ta mustra di forma consistente na nan yiunan mas chikito.”
Pa yena e espacio ey den e habilidadnan di relacion, Matos ta conseha e hende homber pa “subi di nivel” pa loke ta su salud mental.
Esey ta nifica duna balor na su propio mundo interior y respeta su ideanan lo suficiente como pa comunica nan cu eficacia, e psicologo ta splica. E siguiene paso ta pa mira e intimidad, romance y e conexion emocional manera e elementonan digno di su tempo y esfuerso.
“Den un ultimo instancia di tur cos, nos tin e oportunidad di revoluciona e relacionnan romantico y establece norma nobo saludabel desde e prome cita,” e experto ta conclui.