PYONYANG/SEOUL- E desercion a bin mei mei di e proceso di reconciliacion entre Seoul y Pyonyang. Recientemente, ambos nacion a retira nan tropanan y armamento for di e zona fronteriso.
Un soldaat Norcoreano a deserta diasabra pa Korea del Sur, pasando door di e frontera fuertemente fortifica entre ambos pais, segun e agencia Yonhap, citando e Estado Mayor Conhunto Surcoreano. Guardianan fronteriso a detecta e soldaat crusando e liña di demarcacion militar cu su ekipo di vigilancia.
E organismo a señala cu e “agencianan relaciona” lo interoga e desertor pa averigua “e detayenan di con el a yega zuid”, agregando cu no tabata tin “actividadnan especial” di parti di ehercito Norcoreano na frontera.
E incidente no a genera tironan, compara cu november di aña pasa, ora cu un soldaat Norcoreano a wordo herida, ora cu el a crusa frontera y huy pa zuid- Korea.
E desercion aki, e prome den varios luna, ta bin mei mei di un acercamento entre Seoul y Pyonyang. Recientemente, Zuid- Korea a desmantela varios puesto di guardia na frontera cu su bisiña di noord, den cuadro di retiro di tropa y armamento di e zona, y a cuminsa pa traha pa reconecta su rednan feroviario.
“Despues di e demolicion di e puestonan di guardia entre zuid y noord, nos operacion di siguridad na frontera no tabata tin niun problema”, un funcionario di Estao Mayor Surcoreano a afirma. “E soldaat ta safe y ta den nos custodia”.