E caso di sr. Koolman kende a fayece den exterior, ta uno sigur lamentabel. Solange Tchong, kende ta vocero di AZV, a splica ya caba den un articulo anterior, kico ta e proceduranan pa loke ta biahamento den exterior y como tambe e gravedad di e malesa di sr. Koolman, kende ya caba den pasado a yega di bay Hulanda pa busca su salud, pero segun dokternan Hulandes, nan a bay den concordancia cu e specialistanan di Aruba mes. E biahe cu el a haci pa Colombia tabata riba su mes, y AZV a wordo poni na altura di esaki. Awo, Tchong ta splica mas di e proceduranan cu un pashent mester sigui pa loke ta busca salud den exterior y kico ta e rekisitonan.
El a splica cu tur informacion ta manda pa e clinicanan afo prome cu e pashent biaha pa asina e dokternan sa di e caso caminda tur cos ta cuminsa prepara segun Tchong. Nan tin full un sistema caminda cu reportenan medico ta wordo manda tambe online pa e dokternan den exterior. Den un ambiente hopi safe, pero e ta wordo haci, unda cu dokternan ta haya un chens pa comparti informacion cu otro y hasta tin ora duna otro conseho. Esaki ta casonan cu tambe ta sosode.
Tchong a reitera cu tin ora por yega te eynan y kisas den bo pensamento nan a tuma e pulso so of nan a check curason so, y no a haya e saminacion full extenso manera cu a spera, pero no mester lubida cu dokternan tin hopi biaha cu un gran parti, nan ta evalua caba a base di e reporte di kico tabata bo historia medico y tipo di testnan cu a wordo haci den pasado. Esey caba ta gran parti di evaluacion medico cu a wordo haci y esey por defini cierto opinion di dokternan te ora cu bay haci e saminacion.
Diferencia di Cultura
Por ultimo a puntra Tchong kico ta loke e famia a pidi AZV ora e caso a pasa na Colombia pa cual e ta splica cu AZV a yuda den e caso aki.
AZV a wordo pidi pa intermedia pa duna por ehempel duna informacion di contactonan, di Air Ambulance of informacion di por ehempel kico or haci of cu ken tur por papia. Esey a tuma luga, pero ta un servicio cu AZV a duna. Mas no ta AZV su obligacion. Si bay wak e ley, ley ta bisa cu mester tin un peticion adelanta y no a ricibi esaki. AZV no ta mira esaki como un cuido medico haci via AZV. Esey ta nifica cu e caso aki no ta registra como pashent cu actualmente cu ta AZV a sak’e afo y mande na un di e clinicanan.
AZV a wordo pidi pa yuda den duna informacion, manera un tipo di servicio y esey por haci. Tin cu menciona tambe pakico ta haya asina lamentabel loke a sosode, ta pasobra tin cu tene cuenta cu diferencia di cultura tambe tin un impacto riba con ta experencia e situacion den un otro pais. Colombia ta un pais cu no conoce manera nos, funerarianan caminda cu tin freezernan bon ekipa, cu temperaturanan debido pa asina wanta e curpa corectamente den un bon estado. Nan no conoce esey. E cultura di Colombia ta, fayece awe, si ta mainta mes, ya pa merdia of anochi, a dera caba. Ta haya awo e situacino unda cu berdad, ora ta un di nos hendenan ta fayece na Colombia, ta fastioso, pasobra ta tuma algun dia toch pa regla e documentonan prome cu bin bek.
Esaki ta un caso cu sa sosode cu pashentnan di AZV. Ora cu pashentnan di AZV bay Colombia y fayece y ta haye e problema aki tambe, unda cu tin cu informa pashentnan cu tin cu tene cuenta cu nan no tin e sistemanan manera nos y ta haya berdad cu un ser keri cu kisas ta bolbe bek den un estado cu no conoce. Ta cosnan cu no ta leuk, pero ta sosode y ta algo cu di parti di AZV a cuminsa alerta clientenan pa medio di foyetonan di informacion, informacion riba Facebook y nan propio website pa nan tuma nota di esaki, vooral e paisnan latino, no ta ocnoce e infrastructura ora di fayecimento di un hende, manera cu nos conoce, unda cu ta bay den un freezer debido, cu e pashent of e defunto e momento ey por keda den freezer pa algun dia y keda bon conserva. Esey ta algo fastioso pasobra como ser humano ta bay experencia esaki como algo hopi traumatico. Pasobra ta bay wak e ser keri ta cambia. Loke AZV ta haci, ta cu tin algun aña cu ta papiando cu algun hospital caminda cu tin contracto cune, pa por fabor tene cuenta cu pa mas lihe posibel por saca e fayecido for di nan pais. A purba di contact diferente instancia di Gobierno Colombiano e ora, pa nan por yuda facilita, pa e proceso di e documento bay masl ihe, pa asina saca e curpa mas lihe for di nan pais y trece Aruba, caminda cu si tin funeraria y cu tin e ekipo pa trata un hende cu a fayece.