Relaciona cu e incidente di candela di diamars 16 di juni 2020 na Dr. Horacio E. Oduber Hospital, Stichting Onroerend Goed Aruba (SOGA) ta emiti e siguiente declaracion:
“SOGA ta informa cu ta atendiendo e incidente lamentable di candela na un di e edificionan di Dr. Horacio E. Oduber Hospital cu tur e seriedad y deligencia cu esaki ta rekeri.
Representantenan di SOGA, como entidad responsabel pa maneho di e propiedad, a presenta mes ora na e sitio pa asina ta na altura di tur informacion relevante. Inmediatamente SOGA a duna ordo pa laga realiza un investigacion profundo y obhetivo dor di un comision independiente, di expertonan, pa determina e causa di e candela.
Mientrastanto SOGA a instrui e contratista pa pone un stop na tur trabounan di e proyecto di renobacion di Dr. Horacio E. Oduber Hospital te cu proximo aviso, dunando asina espacio pa e investigacion tuma lugar debidamente.
SOGA ta reitera su compromiso pa atende e asunto aki cu transparencia, y suministra e partidonan envolvi den e proyecto, cu un reaccion oportuno y satisfactorio pa cu nan preguntanan. Mas aleu, ora ta dispone di mas informacion, SOGA lo comparti esaki cu comunidad.
Por ultimo, SOGA ta lamenta e susedido aki especialmente e consecuencianan pa e operacion regular di Dr. Horacio Oduber Hospital. SOGA kier hasi uso di e oportunidad aki pa gradici Cuerpo di Bombero, Cuerpo Policial y tur otro instancia of persona cu a contribui na e esfuerzonan pa paga e candela y atende cu e consecuencianan di esaki.”
Te aki e declaracion oficial di Stichting Onroerend Goed Aruba.
Di antemano, danki pa bo(so) cooperacion den su difusion na pueblo di Aruba.