SANTIAGO, Chile- Un grupo di ex soeurnan di Chile a denuncia cu nan tabata victimanan di abusonan sexual di parti di algun pastoor. Esaki lo a sosode durante nan estadia den e Congregacion di Hermanas del Buen Samaritano, ubica na Molina, na 210 km zuid di Santiago.
“E pastoor semper tabata abusando di e soeurnan, sexualmente”, e ex soeur Celia Saldivia a bisa. E no a specifica e nomber di e pastoor. “Nos no ta esclavo, nos ta hende muhe”.
“Hopi biaha mi a wak otro soeurnan sunu den nan camber, mientras cu e pastoor tabata revisa nan”, Saldivia a agrega. E ex soeur a puntr’e un biaha dicon e ta haci esaki y e pastoor a contesta: “Nunca mi a wak un muhe sunu. Y mi kier wak’e. Ki tin di malo?”.
Eliana Macias, otro di e ex soeurnan a confesa cu el a wordo sexualmente viola pa un pastoor, cual nomber, tampoco el a revela. “E prome biaha cu el a mirami na Molina, el a keda wak mi y a bisami” e pechonan ta hopi abao” y el a garami na mi pechonan”, Macias a bisa.
El a agrega cu e pastoor “tabata drenta den e cambernan” y a bisa” Ora el a yega mi cama, el a lanta mi paña y bisa: “Ta haci hopi frieu akiden'”.
E reportahe ta recoge tambe e testimonio di Yolanda Tondreaux, cu a revela cu e abusonan a cuminsa apenas despues cu el a drenta convento. “Un pastoor a brasami, el a acercami na su pecho y cuminsa dunami sunchi, te na mi boca. El a indica cu el a los for di e pastoor, pasobra cu el a ripara y el a haya vies.
Abusonan di e Superiora
E soeurnan a bisa cu nan a denuncia e echonan na e Hoofdzuster, Patricia Ibarra, pero nan no a haya e contesta cu nan tabata sperando.
Tondreaux a bisa cu el a wordo yama pa “gañado” di parti di Ibarra, cu ademas a duna ordo pa bay confesa cerca e pastoor cu el a caba di denuncia.
Consuelo Gomez, otro di e ex soeurnan, a bisa cu Ibarra a “trat’e como si fuera cu e tabata un terorista y el a kita tur cos for di mi. Despues mi a bira nan sirbiente, door cu mi a denuncia e abuso”.