Social Crisis Plan cu 17.8 MIYON pa e promer aña di un total di 36.4 MIYON florin

Parlamentario Endy Croes ta felicita Minister Glenbert Croes y hefenan di tur e departamentonan social cu nan presentacion sublime al respecto e kwartaal rapportage di Social Crisis Plan.

Diabierna ultimo Minister di Asuntonan Social y Labor tabata den Parlamento di Aruba hunto cu hefenan di diferente departamento social p’asina presenta na Parlamento e promer kwartaal rapportage di e placa cu a wordo presupuesta pa atende cu e Crisis Social. Parlamentario Croes ta splica cu Coalicion y sigur Fraccion di MEP a keda hopi contento di locual nan a haña na documentonan di tur e gastonan haci. Como 700 pagina na documento y hopi extenso elabora.

Atencion pa e problema social
Manera cu e gobierno aki a tuma rienda na november 2017 a hereda un desaster financiero, un Mega Debe pero alaves un Crisis Social. Sin tin mester di ripiti e dolornan cu a conmove henter comunidad, Aruba tabata den gara di hopi problema social cu tabata tin mester di atencion y fondonan di inmediato pa combati y brinda atencion real na esnan den necesidad. Gabinete Wever Croes no a basila y Parlamento di Aruba a aproba algo mas cu 34 MIYON pa un periodo di dos aña mientras Minister Glenbert Croes a biaha pa Hulanda y a logra un otro suma di 1 MIYON di UNICEF y finalmente a logra e suma di 36.5 MIYON pa e proyecto aki.

Tur instancia social riba un liña
Den e reportage diabierna ultimo por mira con a uni pa promer biaha den historia un cadena di 30 instancia y departamentonan kendenan ta traha pa e causa y meta social. Hunto cada un a traha nan plan y a traduci esaki den un costo financiero. Directie Sociale Zaken cu nan Team ta trek e proyecto aki. Asina Minister Glenbert Croes a logra pone tur instancia riba un liña, tur mirando den un solo direccion y trahando na bienestar pa resolve y atende e problema social na Aruba. Por a tuma nota cu pa e promer aña a aloca 17.8 Miyon di cual 12% a wordo inverti te cu awor. 33% di esaki a bay na personalnan bon prepara y cualifica pa e ramo aki mientras cu 66% a bay na material, bureau, opleiding etc. Por a tuma nota cu Bureau Sostenemi y Voogdijraad por ehempel a haña entre otro “raadsonderzoekers” y a conclui cu den corto tempo e wachtlijstnan a baha considerablemente.

Asina por midi un adelanto y progreso di inmediato unda e ayudo ta yega rapido na esnan cu tin mester di esaki. Pabien na e Sociale Keten, pabien na tur e actornan di Social Crisis Plan cu ta moviendo shelo y tera pa mira resultado den corto tempo y pabien sigur na Minister Glenbert Croes cu tin esaki bou di su schouder y den su curason. Gabinete Wever Croes cumpliendo cu su programa ‘Hunto pa Aruba’ teniendo e ser humano central.

Comments

comments