MOSCU, Rusia- E ONG Freedom of the Press Foundation a adverti cu cualkier cargo contra WikiLeaks pa su actividadnan di publicacion ta un “menasa increiblemente peligroso pa libertad di prensa”.
Edward Snowden, ex empleado di CIA y di NASA, cu actualmente ta biba den exilio na Rusia desde cu na 2013 el trece den claridad spionahe electronico masivo di Washington, diabierna a manifesta su apoyo na e fundado di WikiLeaks, Julian Assange, despues di cu autoridadnan Mericano supuestamente a revela “accidentalmente” e existencia di e acusacionnan contra di e activista Australiano.
Snowden a alerta a traves di su cuenta di Twitter di e peligroso precedente pa e libertad di prensa cu e supuesto plannan di Departamento di Husticia pa presenta cargonan contra di e fundado di WikiLeaks.
Segun e ex tecnico di CIA, incluso si bo no gusta “wikileaks” y tur loke e ta representa, bo no por apoya e procesamento di un editor pa publica sin restringi e derechonan basico den cual cada corant ta basa su mes”.
“Si bo nenga bo enemigo algo, e no ta un dercho. Kico bo ta defende?”, el a agrega den otro tweet.
Menasa peligroso pa libertad di prensa
Di otro banda, ONG Freedom of the Press Foundation, di cual hunta Snowden ta miembro, e publica tambe un declaracion den cual e ta condena e posibel acusacion contra di Assange. Trevor Timm, director ehecutivo di e fundacion aki, a sigura cu “cualkier acusasion contra di WikiLeaks pa su actividadnan di publicacion ta representa un menasa profundo y increiblemente peligroso pa libertad di prensa”.
Timm a splica cu, “tanto si bo gusta Assange of si bo ta odi’e”, e teorianan uza den un posibel proceso bou di Ley di Spionahe, “lo por ta un menasa na un sin fin di periodistanan” di The New York Times, Washington Post y hopi otro medionan cu ta informa “tocante e secretonan di gobierno henter ora”.