Stichting Monumentenfonds Aruba (SMFA) ta preocupa cu e situacion actual di e edificio monumental Huize Veneranda.
Den Wilhelminastraat caminda diariamente tin desaroyonan ta tuma lugar, edificionan cu añanan a para bashi ta ser renoba, inversionan den edificionan nobo ta trese un cara nobo pa e area . Tur e desaroyonan aki ta pone cu e edificionan cu ta keda bandona ta resalta mas. Un di e edificionan aki ta e edificio di Huize Veneranda. Den su añanan di gloria e cas aki tabata sigur un di esnan mas bunita y unico, no solamente di Wilhelminastraat pero di Aruba.
E edificio tabata originalmente di Veneranda y Frederico Arends, construi mas o menos na aña 1936 pa e conocido Dada Picus basa riba diseño di un cas na Cartagena.
Actualmente e cas ta propiedad di e famianan.
Stichting Monumentenfonds Aruba, ta un Fundacion cu su meta ta pa preserva nos pasado pa futuro y ta di opinion cu un edificio asina unico mester wordo restaura y di experiencia nos sa tambe con facil e ta pa inversionistanan pa tumba abou edificionan asina aki na lugar di restauranan.
Ya pa basta tempo SMFA tin bon comunicacion cu e famia. Na 2015 SMFA a firma un acuerdo cu ta encera cu si tin inversionistanan interesa den huur e edificio na largo plazo, SMFA lo por cumpra esaki y asina restaure debidamente despues cu esaki bira un monumento proteha.
Tin condicionan cu mester cumpli cune prome cu SMFA por cumpra un edificio mirando cu SMFA ta un fundacion cu no ta ricibi subsidio, no por simplemente cumpra edificionan asina sin mas.
Algun condicion ta cu e edificio mester ta un monumento proteha, y mester tin un huurder na largo plaso sin e dos puntonan aki y algun otro criteria mas SMFA no por hasi e inversion di cumpra y drecha un edificio.
Den caso di Huize Veneranda SMFA ta habri pa sinta cu inversionistanan y interesadonan den e edificio.
Mientras tanto e aña aki a duna SUS Ateliers y studiantenan di Hogeschool Rotterdam e oportunidad pa hasi nan Minor project basa riba e edificio aki.
Esaki ta di cuater aña cu SMFA ta contribui na e proyecto aki.
E studiantenan den dos siman den forma di un pressure cooker workshop ta desaroya un plan pa un area of edificio . E plan ta den forma di un recomendacion y ideanan con lo por hasi e maximo uso di un area of edificio. Un ehempel di esaki ta e plan traha na 2013 bou di e titulo perlanan di Rancho cual Stichting Rancho a carga dor di ehecuta partinan di e plan aki manera nos por ripara na e nombramento di cada hanchi manera por ehempel e hanch’I Kalki den e proyecto ‘Adopt-an- Alley’.
SMFA ni e famianan ni potencial inversionistanan no ta mara na e plan aki pero por usa esaki como inspiracion.
E plan di Sus Ateliers ta carga e titulo di ‘Playa mi Orguyo’ . E prome impression di e studiantenan ta cu e ta lamentable pa wak e edificio aki den e situacion actual, mirando e bunita architectura di esaki. Otro siman diamars 1 di november nan lo presenta nan plan y ta invita un y tur pa por bin wak e plan cu e studiantenan a traha pa 6 or di atardi na e edificio di Huize Veneranda.