SMAC y Korps Politie Aruba a finalisa e schedule di Carnaval 63 hunto, cual ta consisti di tur fecha, orario, localidad y ruta pa cu tur evento y actividad organisa pa SMAC.
Despues di e reunion anterior unda SMAC y KPA a sinta hunto, SMAC a ahusta cierto aspectonan riba e schedule siguiente e consehonan di KPA y cu sosten di Gruponan Uni di Carnaval y otro comisionnan organisatorio. Di e manera aki Presidente di SMAC, Sra. Shannon Henriquez y Secretaria di SMAC Sra. Zuleika Wever a presenta e version final di e schedule di Carnaval cu a keda acorda unanimamente pa KPA.
Durante e ultimo encuentro aki por a bolbe sinti un esfera di positividad y meta comun. Bou liderasgo di Sr. Rudy Soemers y Sra. Irma Gordon, KPA a enfatisa riba e responsabilidad grandi cu KPA tin durante temporada di Carnaval y cu nan ta conta cu SMAC pa haci lo maximo pa informa tur esnan cu ta participa y cu ta envolvi organisatoriamente debidamente di e reglanan di orden publico pa cada actividad y parada.
SMAC a keda sumamente contento di por conta cu sosten di KPA, mirando cu SMAC semper ta boga pa mehoracion organisatorio y un experiencia optimal pa tur carnavalista grandi y chikito, como tambe publico en general.
Pueblo por spera di mira e schedule oficial pa Carnaval 63 pronto via medionan di comunicacion y social media, pa por ta bon informa y pa por planea e temporada di Carnaval for di trempan.
SMAC ta agradecido pa e cooperacion di parti di KPA y ta contento cu por a yega na otro, na porta di e celebracion di e comienso di e temporada di Carnaval riba 11/11.
SMAC ta anuncia na pueblo di Aruba, cu e prome evento publico relata na Carnaval 63 ta e “LEGENDS FESTIVAL” cual lo tuma lugar riba diabierna, 11 di November 2016 na Carnival Village, San Nicolas.
Riba 11/11 por spera un celebracion di magnitud grandi cu presentacion di e.o. disfras di diferente grupo di Carnaval, un homenahe na varios leyenda di Carnaval pa nan sosten y aporte continuo na Aruba su Carnaval y tambe lo presenta e jingle oficial pa Carnaval 63 na publico presente.
No menos cu 5 banda musical a confirma nan presentacion ariba e anochi aki, cu sigur lo sa di pone tur presente den e ambiente sin igual di Carnaval. Bandanan cu a confirma ta STEAM, Buleria, Tsunami, N-Fuzion y Le Groove.
Entrada pa Legends Festival lo ta completamente gratis y lo cuminsa pa 7’or di anochi te cu 2’or di marduga. Pueblo por considera esaki como un invitacion personal pa asina hunto cu SMAC inicia e temporada di Carnaval 63.
SMAC ta gradici su patrocinadornan cu ta ATA, Aruba Airport Authority N.V., Aruba Airlines, L’oreal Paris, Romar Trading y SETAR pa haci tur evento y actividad relata na Carnaval 63 posibel.