SMAC ta invita comunidad di Aruba y bishitantenan riba nos isla pa atende e actividadnan di e penultimo siman di Carnaval 63.
Cuminsando den oranan di madruga di diasabra, 18 di Februari, e tan gusta Jouvert Morning lo ranca sali den e cayanan di San Nicolas. Pa 4’or di mainta e jump up lo start cu participacion di 8 banda y 2 disco cual ta: STEAM, BMW, ‘N Fuzion, Flashback Disco, OREO, Le Groove, Madness Band, Mike’s Super Disco, NBO y Tsunami. SMAC ta contento cu e participacion di tanto banda y di por a engrandece e evento extraordinario aki durante e ultimo añanan.
Jouvert Morning 2017 ta wordo dedica na e artista Nando Browne, miho conoci como “Breaker” cu a fayece inesperadamente na hermana isla Corsou. Nando Browne a contribui den gran forma na Carnaval di Aruba como cantante, compositor y mentor y ta conoci pa su participacion den varios banda, e.o. Musical Time, Chupz Band, Chrome Band y Impak Band. Su colaboracion cu varios artista y banda local y internacional ta inmenso y pa e motibo aki SMAC ta honra Nando Browne den forma di e dedicacion aki. SMAC ta extende un palabra di profundo condolencia na su famia, coleganan musical y amistadnan y lo tene 1 minuut di silencio net prome cu Jouvert Morning cuminsa.
Diasabra anochi lo continua cu Aruba su Grand Lighting Parade na Oranjestad. E parada lo sali for di Aruba Entertainment Center pa 8’or di anochi y ta conta cu participacion di 7 grupo. Dushi Carnival Group hunto cu nos Reina Grandi di Carnaval 63, Sabina Rey lo ta na cabes di e parada. Sigui pa e gruponan Champagne Carnival Group, Los Laga Bai, TOB Carnival Group, OPC, Empire Carnival Group y Royal Carnival Group. E last lap band riba e anochi aki lo ta BMW cu sigur lo sa di trece ambiente pa nos publico carnavelsco.
Asina nos ta yega na e clausura di nos paradanan di mucha, cu lo tuma lugar riba diadomingo 19 di Februari. Pa 2’or di atardi Parada di Mucha na San Nicolas lo start na Joe Laveist Sport Park. E secuencia di e parada lo ta mescos cu e Parada di Mucha na Oranjestad, cuminsando cu TOB Carnival Group y nos Reina Infantil Evah Ras, Champagne Kids Carnival Group, Deja Kids conhuntamente cu Centro di Bario Noord y Candy Dancers y Little Groovers. Grupo nos Futuro lo clausura e parada.
Lo tin varios participante y ganador di e diferente festivalnan musical infantil y hubenil riba caya hunto cu e bandanan y SMAC ta sigur di por conta cu e colaboracion di cada banda pa laga nos talentonan hoben briya cu nan cancionnan, cual sigur lo complimenta e experencia total como parada di mucha.
Parada di Mucha na San Nicolas lo finalisa na Carnival Village cu Kimamento di Momito. Publico Carnavalesco y Carnavalistanan ta cordialmente invita pa presencia e evento aki cu lo cuminsa pa 7:30 PM cu animacion di ……. y participacion di nos Carnival Royalties infantil y hubenil.
SMAC ta desea nos comunidad henter un dushi fin di siman y kier recorda un y tur riba e uzo di proteccion solar y cuido di orea pa medio di earplugs. Percura pa suficiente hidratacion pa grandi y chikito, ambos den dia y anochi, y limita e consumo di alcohol den un forma consciente. Tambe ta urgi tur esnan cu ta haci uzo di alcohol pa invita nan #AMIGODIDI pa acompaña nan e fin di siman aki, asina tur hende lo por goza di e paradanan y yega cas sano y salvo.