Riba diaranson 12 di October, pa ta exacto 8:29 di anochi, a ser eligi oficialmente Sra. Shannon Henriquez como presidente di SMAC, encarga cu e organisacion di Aruba su Carnaval 63.
Durante un anochi ameno den presencia di Raad van Toezicht cu miembronan Sr. Hubert de Cuba, Sr. Roberto “Boedoem” Brown, Sr. Percy Jeand’or, Sr. Randy Thiel y demas miembronan di directiva a vota unanimamente pa Sra. Henriquez.
Shannon Henriquez no ta un personahe desconoci den carnaval como participante y ademas di esey a fungi como Secretaria di SMAC pa e ultimo dos añanan. Den statutonan ta stipula cu e presidencia di SMAC ta pa un temporada di dos aña. E presidente saliente, den e caso aki Sr. Thiel, no por re-postula su mes pa e presidencia y tampoco por forma parti di e directiva den otro funcion.
Raad van Toezicht tambe a ricibi e nombernan di representantenan nobo den e directiva. Sra. Zuleika Wever a ser eligi como un miembro independiente y Sr. Ron Refunjol a ser eligi como miembro di directiva representando Gruponan Uni di Carnaval. Debi na e hecho cu Sra. Henriquez no por eherce su funcion como secretaria mas, Sra. Wever a postula su mes y a vota unanimente pa e ta e siguiente sercretaria di SMAC.
Tambe kier menciona cu a despedi di dos miembro di directiva. Kier gradici Sra. Nicole Godett pa tur su bon trabow cu ela desplega durante dos aña. Tambe un danki grandi na Sr. Curtis Fraser cu a fungi como Vice-Presidente durante e ultimo temporada tumando over pa Sra. Ghislaine Winterdaal, den temporada di su ausencia. Sr. Fraser y Sra. Godett a sa di sostene e president saliente den tur trabou y organisacion di Carnaval 62. Ta desea ambos hopi exito pa futuro.
Despues di a ser eligi, Sra. Henriquez a hiba palabra y a dirigi su mes na Raad van Toezicht y Directiva cu palabranan di gradicimento y encurashamento. El a gradici Sr. Thiel pa e confiansa y e guia cu semper el a brinda. Trahando di cerca cu Sr. Thiel pa dos aña a dune e hermentnan necesario pa ta un sucesor exitoso.
Sra. Henriquez tin Aruba su Carnaval na pecho y ta conta cu un team cu hopi animo y gana pa traha pa sigui mehora e fiesta cultural mas grandi di nos país y lo kier sigui traha den union cu tur stakeholder, usando bon y frecuente comunicacion, respet pa otro y cu un meta comun, esta pa engrandece nos Carnaval y percura pa esaki tin e acogida cu nos Pueblo carnavalesco y bishitantenan. Tambe pa Carnaval sigui ta riba e nivel di un evento cultural prestigioso cu caliber internacional.
Cada miembro di Raad van Toezicht a desea Sra. Henriquez, hopi exito den su funcion nobo y forsa pa cu e retonan su dilanti. Sra. Henriquez por conta cu sosten di Raad van Toezicht y ta spera di por ta den comunicacion continuo riba desaroyonan durante organisacion di Carnaval 63. Cada un a gradici Sr. Randy Thiel como presidente saliente, pa e gran trabou cu ela haci den e ultimo dos añanan. Nan sa cu esaki no tabata facil y a mira di cerca con Sr. Thiel a eherce su funcion cu hopi positividad y animo. Nan a expresa e deseo y speransa cu Sr. Thiel por keda den contacto estrecho cu SMAC, pa duna sosten y conseho ora cu tin mester, mirando su experiencia.
Por ultimo, presidente saliente a hiba palabra y tambe a uni su mes na bon deseonan pa Sra. Henriquez. Tambe na e directiva completo a manda palabranan di gradicimento pa e dos añanan cu nan a traha hunto y deseando e dos miembronan Sra. Wever y Sr. Refunjol tur cos bon. A conseha tur hende pa semper traha cu e meta di resolve obstaculonan hunto y pa ta habri pa idea y solucionnan nobo.
Den corto tempo SMAC lo dirigi su mes na pueblo di Aruba cu su prome Conferencia di Prensa den cual lo presenta e cuenta anual, informacion di e prome evento riba dia 11 di november y cu un despedida di Sr. Thiel y introduccion oficial di e Presidente y Directiva nobo di SMAC.