E weekend cu a pasa a kick off cu nos mahestuoso Elecion di Reina Grandi y Sra. Carnaval. Ariba 10 di Februari a eligi nos di 63 Reina Grandi y di 23 Sra. Carnaval pa e temporada di Carnaval 63.
E seis candidatanan a prepara un anochi yen di splendor y creatividad pa e publico presente. Lastimamente na caminda un Sra. Carnaval representando Dreamers Team no por a sigui competi pa motibo di salud. Asina mes e anochi a cana puntual y bunita.
Nos Reina Grandi 63 ta Sabina Rey, representando Dushi Carnival Group/Sta.Cruz, 1st Runner up ta Siobhan Kramers, representando Colegio EPI 2nd Runner Up ta Kimberly Julsing, representando TOB. Pa categoria di Sra. Carnaval, a keda eligi como e Sra. Carnaval 63, Sra. Julie Tromp representando Grupo Champagne. 1st Runner a keda den persona di Sra. Sharylusha Ras, representando San Nicolas.
Parada Sta. Cruz
Diasabra a toca turno na e districto di Sta. Cruz pa mira bek un parada den nan bario. Tabata un anochi na unda Dushi Carnival Group hunto cu Madness Band a carga e parada aki y SMAC ta manda palabra di gradicimento. Tambe tabata tin Quality Brassband. Cu un bon cantidad di publico na banda. SMAC ta spera cu e parada aki lo por sigui crece den añanan nos dilanti y pa por desaroya mas parada den otro barionan tambe.
Traspaso di Mando
Manera ta e tradicion, riba e diadomingo di e prome Parada Grandi di Mucha, a tuma luga e Traspaso di Mando oficial. Esaki ta nifica cu, cu bendicion di nos Minister President ta pasa e mando over pa nos Prins y Pancho Grandi di Carnaval, cu ta keda encarga cu e gobernacion di carnaval. Nan a presenta nan mandatonan y deseonan pa gabinete y tambe pa publico carnavalesco pa resto di temporada. Nan a ricibi e yabi di gobernacion for di Minister President Mr. Mike Eman. Un momento hopi bunita pa mira tur reina y prins cu pancho hunto y tambe ganadornan di otro festivalnan.
Parada di Mucha Oranjestad
Diadomingo a cera cu e Gran Parada di Mucha di Oranjestad. Cu participacion di 5 grupo, TOB Kids, Kids Champagne, Deja Kids/CB Noord, Little Groovers y Nos Futuro. Cu animacion di 2 Steelband, North Stars y NGS, tambe 2 Brassband cu ta Quality Brassband y Massive Brassband, sin lubida e bandanan cu a acompanja e muchanan cu ‘N Fuzion, Tsunami, NBO, STEAM, BMW y e last lap band White Boys Groove cu a participa specificamente pa laga e participantenan di Tumberito y Calypso & Roadmarch contest presenta nan canticanan.
E parade a sali 2’or en punto y a termina cu e ultimo grupo drentando 6:50 di atardi. Na caminda tabata tin na dos ocasion problema mechanic cu trailer di banda STEAM cu a tarda e progreso di e parada un poco. Asina mes SMAC y KPA a considera e parada aki uno exitoso danki na tur mucha cu a participa, y tambe e publico carnavalesco cu a sa di apoya y gosa di e parade mustrando un bon comportacion atrobe.