Awe madruga Wardacosta, den bon colaboracion cu Cuerpo Policial Aruba, a logra intercepta un boto tipo yola cu 4 persona riba lama. Despues cu a detecta e boto sospechoso, a dirigi dos boto di patruya Metal Shark na e sitio. Durante e persecucion e tripulantenan a tira diferente jerrycan den lama.
Pa por a logra stop e boto, personal di Wardacosta a los un tiro di advertencia pa indica na e capitan pa e para e boto. Despues di a logra intercepta e boto, a haya na bordo 4 hende homber di e nacionalidad Venezolano.
E agentenan di Wardacosta a logra saca tur e jerrycannan for di awa. Wardacosta a entrega e 4 hombernan y e jerrycannan, cual ta sospecha cu tin como contenido droga na Cuerpo Policial Aruba. E caso lo sigui den investigacion.