SKOA ta exigi rectificacion di minister demisionario Rudy Lampe

Despues di un periodo largo di silencio, awe finalmente SKOA a reacciona riba e acusacionnan grave cu minister demisionario a haci contra SKOA. Directora di SKOA, Anuesca Baly, den e conferencia a duna un splicacion pa contradeci expresionnan di e mandatario demisionario.

El a cuminsa riba e expresionnan cu SKOA tin un debe miyonario y cu a instiga maestronan demostra contra e mandatario. “SKOA ta un fundacion catolico respeta den e comunidad multicultural y ta sirbi enseñansa. Ta crea un ambiente profesional unda tur envolvi ta sinti nan mes na cas y crece den e balornan cristian. Enseñansa mester forma alumno pa bira ciudadanonan integro, responsabel y digno. Pa logra esaki transparencia,  confiansa y integridad ta primordial pa un cooperacion entre nos fundacion, personal, mayornan y diferente stakeholdernan.”

 

SKOA ta rechasa cada un di e acusacionnan sin base di e mandatario. E acusacion cu SKOA a actua di forma ilegal ora di tuma personal na trabou, a wordo splica di e siguiente forma. El a splica cu nan ta tuma persona basa riba necesidad y den contacto cu Inspeccion y Departamento di Enseñansa. Despues cu SKOA haci su evaluacion, ta manda tur documento pa Departamento y Inspeccion di Enseñansa, cu ta controla y aproba. E procedura aki ta garantisa transparencia den adkisicion di personal. “SKOA Riba su mes nunca por tuma personal. Mescos ta conta cu pago di beneficionan social di limpiesa y pensioen di maestronan di scol. SKOA ta ricibi e pago pa e beneficionan social di finansa y ta pasa esaki pa Departamento di Impuesto y APFA. Pensioen di trahadonan no ta na peligro. Na momento cu Minister stop e subsidio aki, SKOA no por pas’e over pa e departamentonan concerni, cu ta Dimp y APFA. Si tin acto ilegal, SKOA lo coopera cu cualkier investigacion. “

Un ambiente limpi na scol ta importante pa tur esnan cu ta na un scol diariamente, pa cual e trabou di esnan di limpiesa ta uno masha importante. SKOA ta comprende cu den campaña ta haci promesa di solucionnan, pero lansa acusacionnan infunda y atacha integridad di institucionnan cu ta traha duro na bon formacion di muchanan, ta considera esaki un acto malvado y di mala fe. “Di e forma ey no ta soluciona problemanan. Si tin prueba di corupcion y iregularidad den cualkier institucion cu ta ricibi subsidio di gobierno, mester investiga esaki profundamente y culpabelnan mester sinti tur e peso di ley. P’esey SKOA a instrui su abogado pa manda un carta pa minister demisionario y e rectifica publicamente  serio y sin base cu el a haci den rueda di prensa di su partido dia 6 y 13 di april.

 

Comments

comments