E aña aki, SKOA a baha e peticionnan di dia di estudio, mirando cu a perde varios dia na cumisamento di e pandemia algun luna atras. Pues a haci un apelacion na e scolnan pa baha e peticionnan, cual te aworaki esey ta bayendo bon segun SKOA.
Lisi Werleman-Paris, staffuncionaries na SKOA ta bisa cu tin tres periodo den aña caminda cu ta haci un trayecto di profesionalisacion pa maestronan, cual ta periodonan cu ta wordo informa adelanta.
Riba e parti di scol obligatorio, nos tin un ley di enseñansa obligatorio pero “
e ley di enseñansa obligatorio ta pa proteha e mucha su derecho di bay scol,” segun sra. Paris. Loke mas y mas SKOA ta ripara, ta cu mayornan ta tene nan yiunan na cas, anto e ley di enseñansa obligatorio ta specificamente pa esey, pa e mayor cumpli pa inscribi su yiu na scol y cumpli pa trece nan yiu na ora scol. Di otro banda, scol ta duna loke mester duna, pero den realidad esey ta e contenido di e ley aki.
“P’esey nos tambe ta haci profesionalismo pa por duna un calidad di enseñansa, nos a ripara ultimo tempo cu por ehempel pa scol preparatorio, muchanan cu ta haci aña otro aña na September, por cuminsa scol caba na Augustus, pero hopi biaha nos ta ripara cu ora e mucha tin cuater aña y seis luna, e ora nan ta bin aplica pa un scol,” segun sra. Paris. Tin hasta casonan di muchanan cu ta bin aplica ora e mucha tin cu bay scol basico, p’esey pa SKOA ta hopi esencial pa mayornan ta consciente cu tin un ley di enseñansa obligatorio, caminda e mucha tin obligacion di bay scol si tin cupo p’e, si e tin e edad y ta cumpli cu rekesitonan stipula pa ley pa e bay scol.
SKOA ta haci un yamada na mayornan pa cumpli cu inscripcion di muchanan pa aña escolar 2021-2022 mas pronto posibel. Tin algun mayor cu tin escohencia pa cierto scolnan pa nan yiunan pasobra kisas ta mas cerca di cas of trabao, un scol familiar etc, dus SKOA ta pidi pa probecha di e momento, subi website di SKOA y aplica. Riba nan Facebook page tin un video tambe cu ta indica con pa haci inscripcion pa asina brinda bo yiu e derecho di enseñansa.