Den conferencia di prensa Anouschka Bailey a splica cu director di Stichting Skolnan Catolico di Aruba (SKOA) a dicidi di habri scolnan riba 2 di September, un dia mas laat di loke tabata programa. Directora di SKOA a splica cu a yega na e decision aki, despues di diferente deliberacion cu a tuma luga diaranson den oranan di atardi.
Un di nan tabata Mediador di Gobierno, kende for di januari hunto cu Minister di Labor y un commission ta trahando riba e proposicion pa unsolucion pa e trahadonan di SKOA. E dialogo ta habri y “nos ta sinti cu Mediador ta cu nos” y tin Parlamentarionan tambe ta trahando pa yega na un solucion mas lihe posibel pa e scolnan keda habri. “Mi a pasa na diferente scol y muchanan ta contento di ta bek na scol. E ta importante pa muchanan ta na scol pero na un scol limpi tambe. Nos a shovel y manda, unda tin dos werkster, pa un otro scol. E presupuesto ta limita y mester comparti, te ora cu tin un solucion. A haya siguransa cu lo tin un solucion asina cu e gobierno nobo sinta,” Bailey a bisa.
E directora a bisa cu e mayornan tabata hopi comprensivo pa cu e situacion, y no a pone presion pa scolnan habri. Pero Gobierno a priminti cu lo trece un solucion pronto y SKOA tin confiansa cu Gobierno lo bay cumpli cu nan palabra.