Presentacion di proyeccion di video, baile, teatro, poesia, canto, arte visual, musica y banda musical presenta pa Kevin Gumbs.
Kevin Gumbs, ta un hoben bailado profesional di apenas 24 aña di edad kende lo ta presentando su obra nobo titula SKIN den Cas di Cultura. E hoben aki ta hopi conoci caba den e ramo di baile. Pasobra el a cuminsa su carera cu su 17 aña di edad y despues a bay studia na Hulanda pa e bira un bailado profesional.
Despues di a participa na Gang di Arte na 2007 y 2008 den Weganan di Reino su pasion pa baile a crece mas y mas. Na 2010 e ta bay Hulanda pa studia y bira profesional. Kevin a gradua na aña 2013 na Utrechtse Dans Academie y e mesun aña ta wordo acepta na “The University of the Arts” na Amsterdam. Otro aña 2017 den luna di Juni, Kevin lo gradua oficialmente e ora como docente di baile y coreografia profesional.
E obra SKIN ta un concepto cu Kevin ta presentando di su graduacion. Lo tin hoben y artistanan Arubiano cu lo presenta hunto cune den e obra aki manera: Alydia Wever, Pierangely Wever, Natusha Croes, Rosabelle Illes, Jhon Freddy Montoya, Tito Rivera, Edjean Semeleer, Petra Smith, Jeanedy Semeleer, Popcorn Dancers, Step by Step Academy, Empire Dancers y Trash by Ronchi.
Di e manera aki ta invita tur amante di Arte y di Baile pa bin presencia e obra magistral aki cu lo ta un obra inolvidabel y alabes apoya nos hoben local y prometedor den e mundo di baile. No laga hende conta bo, bin experiencia esaki pa bo mes!
Carchinan ta obtenibel na Scol di Arte San Nicolas, Cas di Cultura y na Moustache Chef Bistro pa solamente Afls. 35,=.
Departamento di Cultura Aruba ta orguyoso di un yiu di tera cu a inicia den nos proyectonan di Competencia Hubenil Gang di Arte for di unda su pasion a bira mas grandi pa ta un profesional den e arte di baile. Awo ta brinda e comunidad di Aruba su presentacion artistico multidisciplinario como su proyecto pa finalisa su studio na Hulanda.