E autor di e Regalo di Siman di Buki pa Mucha 2017 pa Aruba, Sjoerd Kuyper, a haci hopi alumno di Ciclo Basico-1 di Colegio Arubano masha contento cu su firma den e buki Hotel de Grote L. Den Crystal Theater na Renaissance el a conta tocante su skirbimento, buki y Aruba. “Ya pa 20 aña caba, mi ta bishita e isla bunita aki, principalmente pa e hendenan simpatico cu ta biba aki.”
Fin di November e alumnonan mester contesta pregunta den un prueba, tocante e buki pa hoben Hotel de Grote L. Kico ta mas bunita cu cera conoci cu e autor en persona? E alumnonan a probecha di e encuentro pa haya sa tur cos tocante e buki y e autor. Un mucha homber kier a haya sa con bo ta bira un escritor y den cua materia bo mester ta bon na scol pa despues bira un autor. ”Bo mester practica masha hopi”, Kuyper a contesta, ya cu e mes a cuminsa skirbi storia y poema for di tempo cu e tabata tin 13 aña. Mientrastanto el a bira un di e escritornan mas conoci di Hulanda, di cual su obranan ta traduci na Ingles, Aleman, Frances y hasta na Turco. Hotel de Grote L. ta filma y a haya e premio Zilveren Griffel. Su buki Het spannendste boek van de wereld ta tuma luga na Aruba. Curaçao tambe ta e escenario pa un di su bukinan.
‘Bo por gaña y inventa hopi, ora bo ta skirbi’, e autor a bisa. ‘Mi a experencia den corto tempo cu skirbimento tabata mas dushi en bes di hunga cu popchi di playmobil. Skirbimento ta manera bo ta hunga den bo cabes.’ Sjoerd Kuyper a conta, cu amor den forma di amistad ta e tema principal den su bukinan, por ehempel amor di un tata pa su yiu homber. Awendia tin demasiado hende cu ta ocupa solamente cu nan mes. Y asina, durante e encuentro interesante y alegre, Kuyper a trece un mensahe importante pa su publico hoben. Pa un ora y mey a lubida un rato riba e celularnan. Inspira pa Kuyper, un Boeli van Leeuwen nobo a sali for di e teatro. Cu un buki firma pa Sjoerd Kuyper. En todo caso cu hopi conocemento cu ta un gran ayudo ora di e proefwerk. Pasobra, nos escritornan recien naci, manera tur dia, tambe mester bay scol y traha proefwerk …
Potret: Autor di buki pa mucha Sjoerd Kuyper ta firma su buki Hotel de Grote L. pa alumnonan di Ciclo Basico di Colegio Arubano.