Diahuebs atardi reporteronan di masnoticia.com a tuma nota di un situacion dilanti airport cu por ta basta peligroso tanto pa e pasaheronan tumando bus, pero tambe pa e trafico pasando riba e avenida aki.
Ta asina cu e area designa pa busnan di Arubus para pa piki pasehero ta wordo uza como area di parkeo, sin respeta e reglamentacion di e area aki. Consecuencia di e practica aki ta cu e busnan ta haya nan mes obliga di para memey di caminda, stagnando trafico cu tur consecuencia cu esaki ta trece cun’e, pa asina por piki e pasaheronan.
Redaccion di masnoticia.com a tuma contacto cu Arubus riba e situacion aki, y por a compronde cu di nan parti a tuma contacto na varios ocasion cu KPA pa yuda cu e situacion pero te ainda nada a wordo haci. Arubus ta bastante preocupa cu e situacion dilanti aeropuerto, como cu e por bira un peliger pa nan usuarionan tambe y ta spera cu pronto autoridadnan competente por tuma accion pa cu esaki.