Den cuadro cu e proyecto piloto ‘Quality of Life of Aruban Youth’, Paula Kibbelaar, Docente, Investigador y Beleidsmedewerker na IPA, y un di esnan encarga cu realisacion di e proyecto aki, ta subraya cu e proyecto piloto aki a yuda trece hopi cos den perspectiva den locual ta calidad di bida di nos hobennan na Aruba, manera sigur e parti social.
A bini dilanti cu e situacion na cas ta determina masha hopi mes e prestacion di nos hobennan na scol. Si e situacion na cas no ta bon of problematico, e ta resulta na problemanan di salud mental, depresion, y problema di comportacion y concentracion. E ta causa un impacto masha grandi riba e condicion y calidad di bida di nos hobennan. “Esey ta e resultado mas fuerte cu mi ta kere nos a haya akinanan.”
Durante e encuesta haci pa e proyecto aki, e hobennan mes a bisa cu nan ta contento, pero tin señalnan preocupante segun sra. Kibbelaar pasobra e hobennan aki ta nos futuro. “Nan no por refleha criticamente na e situacion na cas, nos si, anto e situacion na cas no ta ideal pa hopi hoben.”
E proyecto pilotu aki tabata riba dje un analisacion pre-Covid, dus na momentonan aki cu nos ta den e pandemia, e situacion ta bay mas atras. E resultadonan a bini aña pasa y esaki tabata caba un poco preocupante. “Ami lo kier sa awo post-Covid con e situacion ta na cas cu 5% di desempleo awor a bay pa casi 50% di desempleo riba nos isla, dus e ta mas grave cu e tabata ta aña pasa,” segun sra. Kibbelaar.
Sra. Kibbelaar ta agrega cu por ehempel Respaldo a duna un señal cu a bin un aumento grandi di melding pa problema psikiatrico den nos hobennan, pasobra nan ta na cas constantemente, y si e situacion na cas ta problematico, e ta bira fastioso. “Nos mester keda alerto.”
Akinan por lesa e rapport completo: