FTA a tene varios encuentro den añanan cu a pasa cu economistanan y tambe cu Fundacion Bon Gobernacion y a haya e informacion suficiente riba e parti financiero di pais Aruba, cu a bin ta wordo mal atendi pa hopi aña largo. E gobernacion ultimo aki, esta den e ultimo añanan, a bira pio. El a bira hopi malo, segun Hubert Dirksz, presidente di FTA.
Si ta papia di un deficit cu ta ficticio ainda, pasobra no por bisa cu e ta berdad. Den e presupuesto tin un debe grandi tambe cu por bisa ta come full nos GDP. E ora ey ta con ta bay padilanti cu un desaroyo di un pais di e forma eynan. E situacion ey logicamente tin su consecuencia pa e clase trahado.
Tin cu wak esaki na serio, segun Dirksz. Lo ta dificil pa hopi compania, pero e ta dificil tambe pa e trahado y e peliger ta, cu ta crea situacionnan social no corecto, cu tin su consecuencia riba termino largo. Segun Dirksz, seriedad di e politiconan ta hunga un rol. E clase trahado, of henter e comunidad, mester ta hopi critico y mester sa, mester tin e informacion pa cuestiona politiconan y tuma decisionnan mas corecto posibel.
Dirksz a sigui splica cu hopi biaha tin cu pone e informacionnan hunto, si tin informacion por ehempel di Banco Central, di IMF, di gobierno mes, di CFT, di Fundacion Bon Gobernacion. Tin diferente economista cu por duna e informacion, pone nan hunto y saca afo ken ta bisa e berdad. Na final, no por gaña cu no tin un situacion dificil. E reto ta hopi grandi y e por tin su consecuencia, caminda companianan ta cera y manda trahadonan cas, mientras cu ta papia di un desempleo abao y esey den e direccion cu e ta bayendo, no ta corecto, segun Dirksz. E ta mustra cu desempleo ta mas grandi cu e ta y e situacion financiero ta causa esaki, Dirksz a splica por ultimo.