Durante un bunita donacion na muchanan di Imelda Hof riba Thanksgiving siman pasa, nos a acerca Natalia Hernandez, directora di Imelda Hof pa un corto reaccion riba con ta bayendo cu Imelda Hof, kico tabata e retonan cu e pandemia a trece cu ne y con a maneha esaki.
Sra. Hernandez ta bisa cu e aña aki sigur a trece hopi reto pa Imelda Hof mirando cu Covid19 pa hende grandi mes ta trece hopi emocion, pasobra bo ta haya bo cera na cas sin contacto social pasobra mester cuida bo mes y bo famia.
Na Imelda Hof naturalmente tambe mester a sigui e proceso aki di muchanan cu no por a tin contacto cu nan mayornan of famia, y tampoco por a bay nan actividadnan. Esaki caba ta trece hopi intrankilidad segun sra. Hernandez pa motibo cu e muchanan ta gusta tin contacto cu nan famia, y Imelda Hof mes ta traha hopi di cerca cu mayor y famianan. “Hopi emocionnan a sali y bin ariba, y hopi tambe a bay coba pa wak kico nan tin, ken nan tin den nan bida, el a saca hopi problema emocional di kier sa mas di ken nan hendenan ta, unda nan ta, unda lo bay despues di biba na Imelda Hof,” sra. Hernandez ta splica.
El a cana tog, man den man hunto cu e lidernan di Imelda Hof a logra maneha e situacion di Covid19 cu tur su retonan cu a presenta, y tambe pa e muchanan mes e tabata rekeri pa e team t’ey mas pa scucha nan riba kico ta nan dolor of preocupacionnan.
Danki na social media nan por a sikiera papia y wak nan mayornan cu tog a logra mantene contacto mas despues. Tabata tin otronan cu tabata preocupa pa nan mama of wela cu tambe por a bira malo. Pa Imelda Hof tambe mester a bin algun cambio den programa di dia pasobra e muchanan tabata t’ey 24/7. Ora cu nan bay scol nan tin contacto cu nan amigonan durante orario di scol te ora nan bini bek despues di merdia, pero e temporada cu a keda sin bay scol esaki tabata poco dificil y mester a adapta e programa un poco pa mantene nan bezig, y yuda e muchanan saca tur energia y emocionnan cu nan tabata tin. “No tabata facil pa nos muchanan pero nos ta pasando e fase aki,” segun sra. Hernandez.
Cu e donacion ultimo cu a wordo haci por medio di Island Aquatics Aruba hunto cu 9 otro criador local di pisca Fighting Fish [Betta] siman pasa, ta algo hopi positivo. Actonan asina cu ta trece algo pa e muchanan of atencion individual ta trece alegria bek y sonrisa pa nos muchanan.