Luznan di trafico na Aruba poco poco a bira menos. Pero esunnan cu tin ainda, cada biaha nan ta daña. Actualmente tin tres instalacion cu ta daña. Ta trata di esun dilanti di McDonald’s na Palm Beach, esun dilanti BGD na Playa y esun dilanti La Fama.
Pa loke ta esun di Palm Beach, ta trata di un instalacion di decada di 1980, es decir e ta un sistema hopi anticua. E sistema aki, según director di DOW, Sr. Marlon Croes, a sirbi su tempo. Den dje tin un board printplaat den e kashi cu ta dirigi tur e lusnan. Pero ora cu esaki daña, door cu e ta un sistema bieu, haya piesa pa esakinan no ta algo cu ta bay facil. A bay ariba mercadonan internacional, pa asina haya e piesanan aki pa asina por drecha e lusnan aki bek.
DOW ta considerando diferente opcionan, y un di nan ta pa cambia full e kashi, modernisa esaki por completo pa e sigui funciona. E di dos opcion ta bay cambia e tipo di crusada cu tin akinan y por ultimo bin cu’n rotonde grandi, cu por maneha e fluho di trafico y garantisa e siguridad den trafico. Tur e opcionnan aki lo wordo evalua pa asina wak kico ta e gastonan y pa asina tuma e miho decision.
Ta sigui cu e lusnan dilanti di BGD/La Fama, Sr. Croes a bisa cu e dosnan aki tin e mesun problema. E printplaatnan y board den e kashi ta kima. A manda pidi un quotation for di un compania na Hulanda, pa asina manda busca esaki. Pa loke ta e plannan pa traha un rotonde banda di La Fama, Sr. Croes a bisa cu den decadanan 70 dilanti La Fama tabata un rotonde caba, y despues di basta aña cu e crusada a draai ariba luznan di trafico, ta pensando ariba e miho opcion, y e rotonde por ta un solucion.
Nos comunidad ta dividi tocante e luznan di trafico, unda cu di un banda tin un grupo ta pidi pa bin cu luznan di trafico bek, pa drechanan y un otro ta pidi pa laga e luznan aki paga pa asina e fluho di trafico por sigui sin cu e ta pega. E borchinan di trafico ta pa como back up ariba e crusadanan. Segun Sr. Marlon Croes, director di DOW, ta cuestion di corda nos reglanan di trafico y aplica esakinan.