PORT OF SPAIN, Trinidad- E responsabel di e Centro di Investigacion Sismico di e Universidad di West Indies (UWI) na Trinidad, Joan Lutchman, dialuna a haci un yamado pa Caribe ta prepara pa un posibel “gran teremoto”. Esaki ta debi cu den ultimo dianan a registra varios movimentonan telurico.
Den un conferencia di prensa el a referi na e hecho cu na final di siman pasa, den un periodo di casi 24 hora, a registra 54 temblor den e zona oost di Caribe.
E temblornan a tuma luga entre 6 y 7 di december y e magnitud di e temblornan ta fluctua entre 1.2 y 4.1.
Entre e paisnan afecta pa e movimentonan ta Anguila, Antigua y Barbuda, US Virgin Islands y British Virgin Islands, Dominica, Guadaloupe, Montserrat, Puerto Rico y St. Kitts & Nevis.
E sismologo a adverti di cu ta trata di señalnan cu mester wordo tuma na serio y a duna di compronde cu e region mester ta cla pa “por si acaso un temblor grandi bin”, pa cual “mester ta prepara”.
E ultimo teremoto grandi den Caribe a tuma luga na 2010, na Haiti, unda cu a registra un temblor di intensidad 7 cu a causa mas di 300 mil morto, casi mesun cantidad di heridonan, casi 1.5 miyon damnificado y e casi destruccion total di su capital, Port au Prince.