Sinterklaas lo yega diadomingo awo den oranan di mainta. Vocero di Departamento di Cultura, Stanley Dabian, a manda e siguiente programa pa loke ta e evento cu lo tuma luga diadomingo awo, cual porcierto tambe lo ta celebracion di Dia Internacional di Mucha.
Pa 9’or di mainta e portanan ta habri di APA, caminda cu e evento lo wordo anima pa Julissa Margarita.
Pa 9’or y 40 di mainta, e show lo cuminsa cu un intro di parti di Sinterclub, sigui pa un show di baile di Gucci Dancers. Despues e muchanan lo canta algun cancion di Sinterklaas.
Mientras cu den careda di 10’or Sinterklaas ta yega cu su boto for di Spaña, y ta prepara pa haci su “intocht” riba LG Smith Boulevard te cu Plaza Betico Croes, lo bay tin varios actividad riba caminda, entre otro flashmob.
Mientras tanto cu Sinterklaas ta na caminda pa Plaza Betico Croes, tin un show prepara cu lo wordo anima pa Addonsito Croes.
Lo bay tin baile di entre otro Mini Gucci Dancers, Show di Pierewietje, Diamond Dancers, cual ta start den careda di 11’or di mainta, mientras cu ta wardando Sinterklaas yega.
Mientras cu e parada ta tuma luga, lo bay tin contacto cu Ompi Lyo en bibo for di e Parada. Mientras tanto Dazzling Dancing Divas lob ay tey y tambe Angry Birds. Maykxyon Maduro tambe lo bay tey presente pa presenta dos cancion.
Mientras tanto Sinterklaas lo yega na Plaza Betico Croes, e ta saluda e muchanan cu tey presente. Lo bay tin presentacion di Piet Blo Blo cu yen di mangel pa e muchanan, Candy Dancers lo haci nan presentacion y tambe lo bay tin show di Zootopia.
Pa 1’or di merdia lo bay tin show di Kerekentenchi cu Ompi Lyo. Durante e show lo bay tin Kids 2 Kids Mix Dance Show. Tambe lo bay tin show di Magia cu Piet Abracadabra y tambe Sinterclub lo bay bin cu nan show di baile.
Durante e evento aki lo tin un concurso pa gana premio.
Tambe lo tin presentacion di cancionnan nobo 2016 di Sinterclub canta pa Xennon, Niurianne, Isbale y Javinah.
Pa 2’or y mey di merdia, Sinterklaas ta dispidi di e muchanan presente y e evento ta keda clausura.