Dia 20 di November, cu ta dia mucha, departamento di cultura y comision Sinterklaas, a splica riba e evento cu lo bay bin. Robert Maduro a splica mas di e trabaonan cu ta andando.
Maduro a splica cu riba e fecha ya menciona, lo bay tin yegada di e homber santo. Departamento di Cultura, den nomber di Gobierno di Aruba y Comision Nacional, hunto cu fundacion Sinterklaas, a prepara pa e evento aki, pa di e tantisimo añanan, mas of menos 62 aña, cu nan ta bishitando Aruba.
E aña aki tin sorpresa prepara cu e evento aki cu e lo yega cu su boto for di Spaña y asina aki por bin y bishita nos muchanan cu a comporta nan mes bon dilanti den e aña.
Den nomber di Departamento di Cultura, Gobierno y Comision Nacional, kier a gradici e fundacion Sinterklaas cu esun cu ta organisa e evento. Departamento di Cultura ta sostene por medio di comision, cu facilidadnan manera tur aña manera permisonan cu tin cu tuma luga, e guia di Cuerpo Policial, departamentonan manera Serlimar, DOW, APA, MFA, tur cu ta coopera cu loke ta e fundacion aki pa asina aki por tin e celebracion.
Maduro ta desea e fundacion hopi forsa y exito cu e actividad y sumamente gradicido pa loke ta e preparacionnan cu a tuma luga y cu ta tumando luga. Por bisa si cu kier a enfatisa cu danki Dios por a haya confirmacion cu e actividad aki lo ta tuma luga riba plaza Betico Croes. Manera tur hende sa, e plaza tabata tin su remodelacion y biniendo cla cu e ultimo detayenan cu por tabata tin contacto cu DOW y esaki a haya e luz berde cu e actividad di yegada di Sinterklaas, despues di e parada, lo ta riba plaza Betico Croes.
Maduro a sigui splica, cu compara plaza Betico, Linear Park por ta mas siguridad. Loke ta pasa ta cu tin cu tene cuenta cu tambe e aspecto organisatorio y tambe e aspecto logicamente financiero, cu e fundacion. Plaza Betico ta brinda e oportunidad completo y no ta mucho leu. Eynan tin tur loke ta e parti di logistica cla caba den man, segun Maduro.
Miembro di e comision Sinterklaas Karin Dorts a splica mas di kico por spera pa e yegada di Sinterklaas.
A keda anuncia e yegada di Sinterklaas, cual manera ya menciona ta dia 20 di November. E ta yega pa 10’or di mainta na e containerhaven di APA. For di 9’or y mey APA su portanan ta habri caba, unda cu paden lo bay tin un ceremonia chikito di e pietnan cu a yega un poco mas prome. Manera cu e barco yega di Sinterklaas, e lo baha, e lo wordo ricibi door di e comision di e fundacion Sinterklaas. For di eynan Sinterklaas ta subi den su auto, un oldtimer cu su pietnan rond di dje. Nan ta sali pafo. Ta bay tin un parada for di containerhaven, bayendo Plaza Betico. Den e parada ta bay cu un trainer cu un DJ y musica di Sinterklaas pa anima e muchanan banda di caminda. Ora cu yega Plaza Betico, eynan e muchanan tin chens di saluda Sinterklaas y saca potret cu e pietnan. Riba Plaza tambe ta bay tin diferente actividad. Ta bay tin un show varia, musica y baile. Ta bay tin diferente tent di cuminda. Tambe cos dushi y ta bay tin un carousel, Dino jump. Tin tambe douane cu ta bin cu cacho pa duna un demostracion y brandweer tambe.
Ta invita henter pueblo di Aruba pa bin cu e yiu, pa celebra e dia aki y alabes tambe ta Dia Internacional di Mucha.