E ta conoci bou di e nomber di Sinead O’Connor, pero awo e ta yama Shuhada
E cantante Irlandes, conoci pa su version exitoso di e cantica Nothing Compares 2 U na 1990, a comberti na Islam y a anuncia un cambio di nomber.
Den un mensahe publica ariba Twitter, el a gradici e musulmannan pa nan apoyo.
El a bisa cu e decision tabata “e conclusion natural di cualkier biahe teologico inteligente” y a publica un video di dje cantando e adhan of e yamado islamico na oracion.
Esaki no ta e prome biaha cu O’ Connor, cu aña pasa a cambia su nomber legalmente na Magda Davitt, ta papia publicamente tocante religion.
Na 1992 e tabata protagonista di un polemica ora cu el a kibra e potret di papa Juan Pablo II dilanti e camaranan di un canal di television Mericano como un forma di critica na Iglesia Catolico pa su maneho di scandal tocante abusonan sexual di menor.
Pero shete aña despues, el a wordo ordena como pastoor di un iglesia disidente na Lourdes, Francia. Pero Iglesia Catolico, cu no ta permiti pa e muhe bira pastoor, no a reconoce e ceremonia.
E canta-autor Irlandes, cu a alcansa fama den e decada di 1980 danki na su vos y su composicionnan.
Su prome disco The Lion and the Cobra (1987) a bende 2.5 miyon copia.
Su disco I do not want what I haven’t got (1990) tabata inclui e cantica compone door di Prince Nothing compares 2 U cu a subi e lista di e 500 miho canticanan den historia di e revista Rolling Stone.
E disco ey a bende 7 miyon copia y el a gana un Grammy pa Best Performance di musica alternativo.
Añanan despues, na 2015, el a ricibi un tratamento medico despues di a laga un nota atras unda cu e tabata insinua di cu e lo por comete suicidio.