E situacion di criminalidad tin e preocupacion di henter Aruba. Esaki a trece un spanto y insiguridad cerca cada ciudadano. Por bisa cu famianan ta biba den ansiedad y angustia y esaki nos no por tolera. Di parti di sindicato di Polis, a papia y nan a expresa claramente cu e situacion aki a bay for di man, segun Hubert Dirksz representando Union Sindical di Aruba.
Mester sinta cu Gobierno y exigi di inmediato pa sali for di e situacion aki. No por sigui tolera. Union Sindical di Aruba ta reuniendo pa papia riba e forma di bay den dialogo cu Gobierno riba e asunto di criminalidad cu polis su presencia. Kier medidanan rapido y ta spera cu Gobierno ta pone atencion na esaki cu berdad tin consideracion y tin e boluntad pa cuminsa soluciona e problemanan di criminalidad cu ta asotando na Aruba.
Sindicatonan ya no kier papia mas den sentido. Nan kier papia pero pa yega na decisionnan inmediato. Pa loke ta dialogo riba su mes, riba otro temanan, esey ta kere cu no por tuma luga sin mas, pasobra manera cu el a tuma luga den e ultimo añanan, a wordo desaproba pa tur sindicato.
Kico lo bay papia?
E casonan di criminalidad no a bin ta baha den e dianan aki, aunke ta purbando pa lanta cierto departamentonan di polis. Ta busca un manera, pero ta sinti cu e minister ta struggle hopi den e parti di Placa. E punto di bista no ta yega di biaha y bisa Gobierno cu si ta placa mester, pone di biaha y no keda dialoga den e caso aki.
Dirksz a splica cu tin cu actua di biaha. Na conocimento di e union sindical, ta cu tin placa disponibel y solamente nan mester wordo aloca debidamente. E prioridad awor aki tin cu wordo tuma, wordo reconoci y traha riba dje. Tin placa disponibel y ta kere cu awor aki ta decision tin cu wordo tuma y e sindicatonan lo forsa y ta spera cu Gobierno compronde esaki cu decisionnan mester wordo tuma inmediatamente.
Riba e parti di criminalidad, awor aki e sindicatonan ta tratando di ta riba un liña, pero sigur e sindicatonan di polis, FTA y SADA, lo firma un carta y manda pa Gobierno pa nan trata inmediatamente.
No tin un plan di parti di Gobierno, segun Dirksz. Y si tin plan mes, awor aki e sindicatonan kier pa tin prioridad y hechonan concreto y den corto tempo.