Durante un entrevista cu Presidente di Sindicato STA, sr. Diego de Cuba, a duna di conoce cu Arubus ta pasando den hopi reto financiero cu a intensifica mas ainda durante e pandemia. Pero e reto mas grandi den opinion di sindicato ta STA, ta e hecho cu Arubus tin di financia tur gasto di tanto Aruparking como Arutram, pasobra e companianan aki no ta trece ningun aporte financiero pa sostene nan mes, cual ta haci cu awor Arubus ta practicamente sangrando.
Maske cu Arubus ta wordo subsidia door di Gobierno, e situacion di e compania estatal di Transporte ta uno precario y carga cu e gastonan di Aruparking y Arutram ta haci’e pior ainda. “E dos companianan aki ta un cancer pa Arubus”, tabata expresion di sr. de Cuba refiriendo na e retonan financiero cu Arubus tin cu enfrenta.
Mas aleu sr. de Cuba a duna di conoce cu Arutram “ta un kapitaalvernietiging cu nunca mester a bin cun’e”. Esaki pa motibo cu Arutram ta generando 0 entrada y no ta dunando un balor agrega pa nos pais, pero si ta sacando placa for di un Arubus cu tin’e hopi dificil caba pa sobrebibi.
Sindicato STA ta di opinion cu Gobierno tin di tuma un decision hopi liher pa loke ta Aruparking y Arutram, pasobra Arubus no tin manera mas pa sigui mantene e 2 companianan aki. “Sea ta haci Arutram y Aruparking un NV riba nan mes of ta doek nan op, pero cos no por sigui asina ki”. Presidente di Sindicato STA, sr. Diego de Cuba, a splica.