Sindicato STA ta contento cu e director nobo di NV Elmar

0

Sindicato di Trahadonan (STA) tabata tin un reunion cu NV Elmar siman pasa. Y por bisa cu tin un pas laboral ta reinando den e compania. Sr. Diego de Cuba, lider di sindicato STA ta amplia.

Nan a papia cu e gerencia di NV Elmar y nan ta felicita e director nobo, Sr. Albertico (Tico) Koolman, cu a wordo nombra pa un periodo di 18 luna. Sr. Koolman ta un persona recto y habri pa e trahadonan. Si tin algo cu e por yuda, e ta yuda. Y si e no por, tambe e ta bisa esaki, pero nan un manera amabel. E conoce e compania door en door y STA ta spera cu e trahadonan keda sostone Sr. Koolman. Ta bay tin cambionan bunita na caminda pa NV Elmar.

Algo otro cu a wordo discuti cu e gerencia di NV Elmar, ta cu Utilities, den bista di sindicato, no ta necesario ya cu esaki ta un malgastamento di placa innecesario. NV Elmar tin su board pa vigila loke ta pasa den e compania y tambe ta conta pa Setar y WEB NV. Ultimo Utilities a construi un edificio na Eagle, banda di TNO. Ta keda na gobierno actual pa pone un stop na e bagamunderianan aki. Utilities no tin derecho di existencia pa cual e mester keda elimina. Laga e director y e boardnan di cada compania tuma e decisionnan. Ta hopi placa ta wordo paga na salario y esaki por wordo gespaar pa yuda pais Aruba. E ta un ‘bezuiniging’.

STA a cuminsa atende cu e director nobo di NV Elmar ya cu den e ultimo reunion e tambe tabata presente den e reunion di STA cu e directiva, cua a wak den Sr. Koolman e persona mas indica pa asina fungi como director di NV Elmar. Sr. de Cuba ta di opinion cu sindicato STA lo tin un bon comunicacion cu e director, y e comunicacion entre e doño di trabao y e trahado mestr ta bon.

E bon noticia ta cu e pensionadonan di NV Elmar tambe lo forma parti di e festividadnan di fin di Aña di NV Elmar. Esaki tabata algo cu e director saliente a kita. Pero STA ta contento cu esaki ta bin bek, ya cu asina e pensionadonan por ta participe den e compania su celebracion di Fin di Aña. Y e pensionadonan tambe lo ta hopi emociona di por topa cu nan ex coleganan bek durante e festividadnan di Fin di Aña, segun Sr. Diego de Cuba, lider di sindicato STA.

Comments

comments