Tin entendi cu dos colega polis a keda deteni. Ta deber como sindicato SPA, mirando cu hopi colega no ta na altura kico ta pasando, pa yama un reunion pa asina nan keda trankil, pa evita cu nan lo pensa otro cos. Segun presidente di Sindicato di Polis, Juan Gomes, pesey ta yama e reunion pa pone nan na altura cu tin un procedura y e tin cu cana su caminda. Pesey ta yama e reunion aki pa tene nan trankil.
Gomes a sigui splica cu den e caso di investigacion mes, no por duna mucho informacion, mirando cu kier laga esaki cana su caminda.
E caso sigur tin su preocupacion, vooral si un colega of miembro no sa kico ta pasando, preguntanan ta cuminsa bin dilanti. Esaki ta haci cu hendenan ta bay specula cos robes y kier evita esaki.
Esaki no tin nada di haber cu Carnaval, segun Gomes.
Tin un polis cu ya ta deteni, cual caso ta basta conoci den comunidad. Pero e casonan aki no ta mustra di ta cerca di otro. Si tin hopi detencion y a haya critica cu SPA no ta haci nada pa su miembronan. Pesey a dicidi pa pone e reunion pa splica nan detayadamente di e procedura y pa nan keda trankil.
Ora cu tin un investigacion y no tin mucho informacion no por sali tampoco, Esey ta trece preguntanan cun’e. Esey ta haci mayoria di e coleganan, ta cuminsa preocupa y preguntanan ta cay. Pesey SPA tey como sindicato responsabel pa pone nan na altura kico mester sosode.
No sa si leiding ta bezig, pasobra nan no a tuma contacto cu e sindicato, segun Gomes. Como sindicato responsabel SPA no ta para pa cosnan cu a wordo haci malo. Pesey ta pone e miembronan na altura bon cla, pa no bay haci nada malo y para tras di sindicato, pasobra e ora e sindicato no por defendenan asina ey. Pasobra mañan cu Dios kier ta nan dedenan nan ta kima y kier evita esey, segun Juan Gomes, presidente di e sindicato.