Sindicato SIMAR ta conta atrobe cu presidente sra. Josephine Albertus kende ta papia di retonan y meta pa 2021. E ta comparti cu prome cu Covid-19 ya caba enseñanza tabatin su retonan.
Awo cu 2021, mester tene na cuenta e landspakket cu ta keda cu hopi pregunta, kico ta bay ta inversion pa enseñanza y kico ta bay pasa cu e 25 miyon ‘cu a aloca otro caminda’. Segun sra. Albertus pa enseñanza lo falta hopi y mester wak e futuro di e pais.
Sra. Albertus ta bisa cu ta den liberacion cu minister di enseñanza. “A wordo priminti e 25 miyon cu ta bin bek pa asina enseñanza sigui inova y mas na e parti digital di 2021 pa motibo di Covid.”
Di parti di SIMAR, sra. Albertus ta bisa cu tur nan miembro no mester tin miedo, nan lo keda salvaguardia y garantisa derecho di nan docente, tambe den enseñanza cu ta conta pa e studiantenan y mayornan ‘henter comunidad’.
“Tur ta forma parti di e triangulo di enseñanza. Nos no sa kico tur ta bin, y no ta facil tampoco. Pa 15 di december mester tin e documentacion pa COHO cla. Pa asina tin screening pa 15 di january.
Un cos nan lo keda boga y traha p’e ta cu e directiva di tur scol mester keda envolvi den tur aspecto. Sea si tin cambio, e docentenan mester haya sa na tempo pa asina por dedica na inova y desaroya.
“Mester corda cu maestronan a haya aumento den nan trabou pa cambio y ahustacion den enseñanza, manera digitalisacion, trabounan administrativo y otro mas. Mester brinda nan tempo pa nan ta bon prepara”, e ta splica.
Pa sra. Albertus, nan ta den constante debate di kico ta bay pasa y Aruba ta haya placa for di Hulanda y kico ta e prioridad den enseñanza. Pa asina nan cuminsa prepara di awo. Pa nan e proceso y plan ta pa yega na nan meta cu ta un bon calidad den enseñanza di aruba.
“Pa nos ta importante pa nos tin claridad den e veld, pa asina tin mehoracion den e veld y cu tur directiva keda envolvi pa sigui cana y brinda e miho educacion”, sra. Albertus a splica.